Naduh 06tarik yn sdang ka Shillong Premier League, yn ïakhun nyngkong ka Nangkiew bad Nongrim

Shillong, Naitung 29 : Ka lympung ïalehkai jong ka Shillong Premier League 2025 kan sdang naduh ka 06tarik Nailar mynta u snem ha ka rukom kaba thymmai da ka thong ban rah ïa kane ka lympung ïalehkai ba heh tam ka jylla sha ki kyrdan kiba kham shajrong.
Ka Nangkiew Irat bad ka Nongrim Hills ki dei ki artylli ki kynhun kiban sdang nyngkong ïa ka lympung ïalehkai mynta u snem ha kaba ïa ki jingïakhun baroh kin long ha madan SSA Stadium, First Ground Polo.
Ha ka sngi kaba bud pat ka Mawlai kaba dei ka kynhun ba wan baar ha u 2024 kan hap ban aireng pyrshah ïa ka Sawmer, katba ka kynhun ba bat ïa ka nam lahduh ka Shillong Lajong kan aireng pyrshah ïa ka Rangdajied United ha ka 09tarik.
Ki artylli ki kynhun kiba kiew na ka First Division ha u 2024 ba kynthup ïa ka Mylliem bad Malki kin sa mih madan lang ha ka 12 bad 13 tarik pyrshah ïa ka Langsning bad ïa ka Laitkor.
Ki jingïakhun ha ki san tylli ki jingïalehkai ba shakhmat kin long ha ka por 5.30 baje janmiet hapoh ka floodlight katba kiwei ki jingïakhun kiba bud pat kin sdang ha ka por 3:45 baje janmiet.
Ha u snem 2024 ka Shillong Sports Association ka la shim ïa ka rai kaba radbah ban kyntiew ïa ka jingdon ki klob sha ka 10 tylli kumta kane ka la kyntiew ïa ka jingnang bun tylli ki jingïakhun na ka bynta ki nongkyrshan bad ki nongpeitkai. kumta dei na kane ka daw ba ka Synjuk ka SSA ka la wanrah da ka rukom kaba thymmai ha kane ka league mynta u snem.
Ïa kane ka SPL yn pynlong ha ka one leg, kaba mut ba kawei ka kynhun ka hap ban ïakhun kawei ïa kawei pat shisien. Kumta ka klob kaba ïoh ban bat ïa ka kyrdan kaba nyngkong hadien ba la kut ki 45 tylli ki jingïakhun kan ïoh ban rah ïa ka nam lahduh katba ka kynhun kaba wan ha ka kyrdan ba ar kan ïoh ban wan kum ka kynhun kaba wan ba ar.
Ka samoi ïalehkai kan bud pat sha ka Shillong Super Cup ne ka Super 6, kata d kaba ailad tang ïa ki hybruew tylli ki kynhun SPL kiba wan hakhmat. Ka kynhun ba wan ba nyngkong bad ba ar ha ka miej kheiñ point kan ïoh rung beit beit katba ki kynhun naduh kyrdan ba 3 haduh ba 6 kin ïakhun para ma ki ha ka playoff .
Kaba sah hadien kane kan long sa ka lympung bah kata sa ar tylli ki semi final bad ka final.
Ka jingpynhiar kyrdan (relegation) kan bteng ban treikam kumba ju leh ha ka SPL ha kaba ki artylli ki kynhun kiba sha trai duh kin hiar biang sha ka First Division ha u snem 2026.
Kumba long mynta, ki nongïalehkai ki la pynkhreh bha la bun taïew bha da ka thong ba kin lah ban ïalehkai bha ha kane ka samoi. Da ka jingpynlong ïa ka Single Leg ka lut ba baroh ki jingïakhun ki long kiba kongsan bha bad kumta kane ka sienjam kan nang pynshongshit shuh shuh ïa ki paidbah nongkyrshan.