Nadien ka bos skul Mt. Zion HSS tynrah ka trok kit clinker katba dang kyntiew khynnah

Nongpoh, Rymphang 19: Bun ngut ki khynnah kila mynsaw ha kawei ka jingjia aksiden kaba shyrkhei kaba la jia haka step jong ka 19 tarik Rymphang hadien ba kawei ka trok kit clinker kaba don ïa u number NL 01 AA 4672 kala leit ban tynrah beit nadien kawei ka bos skul kaba don ïa number ML 10 D 5047 kaba dang ieng ban kit khynnah skul ha 17 mer, Pahamlang ha Ri-Bhoi District.
Katkum ka jingïoh lum jingtip, katei ka bos ka dei jong ka skul Mt. Zion Higher Secondary School, 15 Mer Byrnihat, ka dang sangeh ha ka por kumba 8:15 baje eiei mynstep ban kit ïa ki khynnah skul, hynrei, katei ka trok kaba la kynnoh ba kala pynher sted haduh ba u nongñiah um lah shuh ban tehlakam ïaka kali bad leit ban tynrah beit nadien jong ka bos.
Ha kane ka jingjia, uwei u heprit u la duh noh ïala ka jingim ha ARHI Hospital Jorabat, namar ka jingmynsaw kaba la kham jur bad bun ngut ki khynnah ki la mynsaw jur bad la pynkit noh kloi sha ki jaka sumar ban ioh jingsumar kaba paka, katba kiba mynsaw malu mala pat la rah sha Byrnihat PHC ban peit bñiah ïa ka koit ka khiah jong ki.
Hadien kane ka jingjia, ki pulit jong ka Byrnihat Police Outpost ki la leit sha katei ka jaka ban pynlong ïa ka jingtohkit. La ong ruh ba u nongñiah trok uba la pyrshang phet krad, hynrei la kem noh ia u da ki pulit ka Ri-Bhoi haka jingtreilang bad ki pulit ka West Jaintia Hills District bad ka jingtohkit halor kane ka jingjia ka dang iaid shakhmat.