Nabar jylla yn leit wad jingtip ka Sorkar kumno ban pynbeit ïa ka jingeh ki nongñiah Tourist Taxi

Shillong, Nailur, 23: Ka Sorkar Jylla ka la pynthikna ban wad bniah ïa ki polisi na ki jylla ba marjan bad ban wanrah ïa ka rai na ka bynta ban weng ïa ki jingeh ba ki nongñiah kali kamai Tourist ki ïakynduh ha ka jylla.
Ïa kane ka rai la shim hadien ka jingïalang ba la pynlong da u Symbud Myntri Rangbah ka Jylla uba khmih ïa ka tnat Transports u Bah Sniawbhalang Dhar bad ki dkhot ka All Khasi Meghalaya Tourist Taxis Association (AKMTTA) ha ka sngi Baar.
Hadien ba la wai ka jingïalang, u Bah Dhar u la ïathuh ha ki lad pathai khubor ba baroh arliang mamla ki don ha kajuh ka jingmut bad ki la mynjur ban ïatreilang ban wanrah ïa ka rai kaba skhem.
“Ha,oid, ka long ka mat kaba kongsan bad ngi donkam katto katne por ban (peit bniah) bha ïa ka halor ki jingmyntoi bad ki jingduhnong khnang ba kan ym don kano kano ka jingeh ha ka liang ka aiñ. Kata ka dei ka rai kaba ngi la shim mynta ka sngi. Ngin pyrshang (ban pynbeit ïa ka mat) kham kloi katba lah.”
Kumba la kyrpad da ka AKMTTA, u Bah Dhar u la pyntip ba ka Sorkar ka la mynjur ban pule bniah ïa ki polisi jong ki jylla ba marjan, kynthup ïa ka Sikkim, Karnataka, bad Maharashtra, ban sngewthuh ïa ka lynti kaba bha tam na ka bynta ban weng ïa ki jingeh ba ki kali kamai Tourist ha ka jylla Meghalaya ki ïa kynduh.
“Ngi la pynthikna ïa ki ba ngin ïakren bad ki khyndiat tylli ki jylla ba marjan bad ngin ïanujor bad ki polisi jong ki bad ngin poi sha ka rai kaba dei,” u la ong haba bynrap ba la bthah ïa u Chief Secretary bad ïa u Commissioner ka tnat Transport ba kin ïatreilang bad kiwei ki jylla ban ïanujor ïa ki polisi bad ban wanrah ïa ka rai kaba lah ban pyntreikam na ka bynta ka Jylla Meghalaya.
U la ong tad haduh ban da shim ïa ka rai, yn pynneh shwa ïa ka status quo.
“Ka jingïakhih kam dei ban don namarba ka jingïakren ka dang ïaid. Ngi don lang bad ka la long ka jingïalang kaba seisoh bha bad kyrmen ba kan don ka jingmih kaba bha ha ki sngi ban wan.”
Haba kylli, u Bah Dhar u la ong ba ka AKMTTA ka la dawa na ka Sorkar ba kan wanrah ïa ka polisi ban pynthikna ba ki trai shnong kin ïoh jingmyntoi na ki jaka jngohkai pyrthei da kaba bynrap ba kata ka dang don ha ka jingpyrkhat jong ka Sorkar.
Shuh shuh u Bah Dhar u la ong ba ka Sorkar ka la kyrpad ïa ka seng ki nongñiah kali kamai Tourist na ka jylla Assam bad Meghalaya ba ïa mynta shi por katba ka jingïakren ka dang ïaid kam dei ban don kano kano ka jingpynwit ïa ka leit ka wan jong ki paidbah.