Nongpoh, Nailar 02: Man la u snem ki paidbah ha ka sor Nongpoh ki ju mad ïa ka jingshlei um bad ka daw ka long na ka jingbym biang ki Nala Um ka surok 4-lane ha Ri Bhoi District.
Kine ki jingshisha ki la paw ruh mynta ka sngi hadien ka jingther u lapbah uba la neh kumba 3 kynta ei ei ha kaba ka um ka la shlei ha sor Nongpoh haduh ba la thud ki paidbah ha ka leit ka wan.
Nalor ka jingshlei um ba la tap ïa ka surok ïaid paidbah (Service Road), ka um ka la rung ruh wat sha ki dukan kaba la ktah ïa ki nongshong dukan ha sor Nongpoh.
Kane ka bynta kaba shah ktah ka dei naduh jan dukan Amit Restaurant haduh ha jan Nongpoh Police Station ba ka um slap ka la tap ïa ka surok bad bun ki Kali ki la sahkut ha surok bad nalor kata ka um ka la ioh lad ruh ban rung wat sha ki dukan jong ki nongshong dukan ha katei ka jak aba shah ktah na ka jingshlei um.
Kum ban pynkynmaw, halor kine ki kam sahteng ban pynbha ïa ka surok 4-lane ha Nongpoh la ju ïa kren na ka por sha ka por bad la don ruh naduh ka jingthmu ban tei ïa ka flyover Bridge ha Nongpoh, ban pynheh ïa ki Nal Um bad ruh ban dang pynbha ïa ki surok ba dang duna, hynrei kane ka jingïakren kam pat poi shano shano ruh bad tang shu wan u lapbah kiba bun ki paidbah ki ju shah ktah na ka jingshlei um kaba dei tang na ka daw ka jingbym biang ki Nala Um.
