Jowai, Jylliew 21: Ka Jaiñtia Students Union (JSU) Syndai Unit mynta ka sngi ka la leit kynduh ïa u Executive Engineering Meghalaya Energy Corporation Ltd Jowai hapoh ka jingïalam jong u Vice-President samla Bankerlang Lamurong ha ryngkat ka jingdonlang u General Secretary ka seng u samla Heiplanmiki Tariang halor ka jingduh noh ka light la lai taïew ei ei ha katei ka thaiñ.
La ïathuh ka jingsniew u Transformer uba dei ban sam bording ïa ka shnong Syndai Kmaishnong bad Syndai Mission kaba la buh jingeh ïa ka shnong ka thaw hi baroh kawei khamtam ki khynnah skul kiba dei ki lawei jong ka ri bad ka shnong ka thaw namar ba kim ïoh lad shuh ban pule kot ha ka por mynmiet.
Ka seng ka la buh dorkhas ruh ha kaha ïadei ban maramot ïaki main laiñ post kiba la kdor bad kiba buh jingma ïaka leit ka wan ki nongshong shnong bad ki ïing kiba don marjan bad une u post light uba pynïasoh na ka shnong Syndai shaduh ka shnong Muktapur.
Halor kane ka seng ka dawa jur ïa ka office treikam jong u Executive Engineering MeECL Jowai ban leh katba lah ban pynïoh kloi ïa u Transformer ba thymmai khnang ba ka shnong ka thaw kan ïoh jingshai biang.
