Shillong, K’Lyngkot 02: Ka jingbym lah ban shim khia da ka tnat kaba dei peit ban pynbha bad maramot ïa ki surok ha ka jylla bad khamtam ha ki jaka jong ka sor Shillong ka la long kawei na ki jingeh kiba khraw bha ïa ki paidbah ha ka leit ka wan bad khamtam ïa kito kiba don ki kali kiba la mad bha ïa kine ki jingeh.
Ha kaba ïadei bad kane watla ka sorkar ka la kob ba kan pynlong ïa ka nongbah Shillong kum kata ka Smart City hynrei haba phai pat sha ki jaka kiba don hapoh ki nongbah khamtam eh ha Nongbah Shillong la shem ba kine ki surok kiba na ki, kidei kiba la sniew bad kumjuh ruh kiba la sdang ban tuid lut ka rong bad kumjuh ruh ka jingmih jong ki maw napoh.
Kawei ruh na ki daw ka dei eh naba ïa kine ki surok kiba dei kiba kongsan bha kiba don ha nongbah Shillong bad ki jaka kiba khampaw bha, la lap ba ki dei ki surok kiba la thep lang da ki pipe um napoh bad sa shu tap da ka rong ha ka por ba siang rong ïa kine ki surok.
Halor kane kiba bun na ki paidbah bad khamtam eh kito kiba kamai kali na kiba ñiah kali ki la pynpaw ïa ka jingeh kaba khraw bha khamtam ha ka por ba dang jur bha ka dheng kali ne ha kaba por ba ki hap ban ïaid la ka ïaid noh naba shah beh ha ki pulit pynïaid kali.
“Kane kadei kawei na ki surok kaba la sniew bha mynta la bun bun bnai kaba dei hangne ha Motphran bad kaba dei ruh ka surok kaba bun bha ki kali kiba ïaid ba ïeng, ba kynthup ïa ki kali kamai bad kumjuh ruh ki kali shimet, hynrei ym shym la ïohi satia ba kin don kino kino ki briew kiba na ka liang ka sorkar ki ban wan ban peit ne khmih ïa kane ka surok kaba dei kaba la sniew bha mynta kaba la bun bun bnai,” ïathuh kiba ñiah kali haba kren bad u nongthoh khubor.
Lah ban ong ba kane ka surok kaba la sniew bha kaba don ha Motphran ka dei kaba sniew mynta la bun bun bnai hynrei na ka liang jong ki bor sorkar ne khamtam na ka tnat PWD Roads kiba wan ban maramot ne ki ban wan jurip.
