Naba rem ha ka Wahlyngkien, hiar kyrdan ka Laitmawhing SC sha ka Second Division

Shillong, Nailar 31: Ka Laitmawhing SC ka la hiar sha ka kyrdan 2nd Division ha ka lympung ïalehkai jong ka Tyrsad Area Sports Association (TASA) hadien ba ka la rem da 1-2 kol hakhmat ka Wahlyngkien Ramklang SC ha ka lympung ïalehkai 1st Division ha ka sngi Balang.
Ha katei ka jingïalehkai ka Wahlyngkien Ramklang SC ka la thep ïa ki ar kol lyngba u Revil Rymbai uba la thep lyngba ka penalty bad ka shi kol la thep da u Khraw Lyngdoh katba ïa ka shi kol na bynta ka Laitmawhing SC la thep da u Ïohbor Nongbsap.
Ha kane ka jingïakhun ka la buh jingeh bha ïa ka Laitmawhing SC namar ka hap ban jop beit khnang ba kan neh haka 1st Division hynrei baroh ki jingpyrshang kim shym la urlong kumba la thmu bad ka la hap ban shu hun beit ban hiar sha ka 2nd Division.
Ha ka jingïakhun jong ka 2nd Division, ka Kyrphei SC ka la rung sha ka final hadien ba ka la pynliem da 1-0 ïa ka Perkseh SC bad ïa katei ka shi kol la thep da u Apbor Rynjah ha ka minit ba 45 jong ka jingïalehkai.
Haba phai pat sha ka jingïalehkai jong ka 3rd Division, ka Wahlyngkien Ramklang SC ka la rung sha ka semi-final da kaba pynliem da 1-0 pyrshah ïa ka Rangkynsai FC. Ïa katei ka shi kol la thep da u Tobar Khongsit ha ka jingïalehkai ba 12 minit.
Ka jingïalehkai First Division kaban long ha ka 5 tarik Nailur 2022 ka Phanniewlah Rum SC kan ïakhun pyrshah ïa ka Mawsawrit SC ha ka por 12 baje nohphai sngi. Ka Bara FC pyrshah ïa ka Umkaber SC ha ka por 3 baje janmiet.