Shillong, Iaiong 18 : Na ka jingleit leh sngewbha bad bam khana Easter poi pynban sha ka jingsngewsih namar uwei u samla briew u la duh ei ïa ka jingim ha la wah Chickra Manda bad uwei pat u samla lud ha ka wah Simsang.
Une uba iap jyllop ha ka wah Chickra Manda u dei uba kyrteng u Sengja D Shira 28 snem ka rta. U dei na ka shnong Damas, North Garo Hills bad ïa ka met jong une la ïoh sei mynta hi ka sngi katba ïa u Niksrap ba shah rong ha ka wah Simsang u dei na ka shnong Gondenggre, Jengjal bad ïa ka met jongu ruh ym pat lap satia namar ka jingjngut ka bad jingkiew palat ka um.
Baroh arngut kine ki samla ki leit bam khana lang bad ki paralok sha kitei ki ar tylli ki wah. ïa ka met jong u Shira la ïoh sei da ki pulit na ka jaka hapdeng Wage Asi bad Rongmil.
U Niksrap ruh u la leit bam khana sha rud ka wah Simsang ryngkat bad ki paralok ha ka jaka ba la tip kum ka Rongkem. Hynrei ha ka por ba ïeng harud wah ula shah rong noh ha ka umsaw bad kat haduh ba thoh iaka khubor ïa ka met jongu ym pat ïoh sei satia da ki pulit .
Na ka liang u SP ka East Garo Hills u Bruno A Sangma ula ïathuh ba la dep maham ïa ki briew ba kim dei ban tur sha rud wah namar ba la jur slap bad ki wah ki kiew um kynsan hynrei wat la katta ruh da ki hajar hajar ngut ki paidbah ki ïaleit bam khana Easter sha ki wah bah ha rilum Garo kum ka Ganol, Simsang, Jengjiram bad kiwei kiwei ki wah.
