Shillong, Naitung 15: Myntri ka tnat Rep bad Animal Husbandry & Veterinary ka Sorkar Assam u Atul Bora, ula shah ujor ejahar bad shah pynrem jur namar ka jingkynnoh ba u ai injek dawai ïa ki mrad ba shah ktah ha ka jingshlei um.
Kane ka wan hadien ba ka dur jong u Atul Bora ka la saphriang ha ki rynsan Social Media ba u dang ai injek ïa ki mrad hapoh ka Veterinary Camp ha ka shnong Bongkuwal, kaba la pynlong ïa ka seng Krishak Mukti Sangram Samiti ban ujor da ka ejahar pyrshah ïa u Myntri Sorkar.
U Hirakjyoti Saikia, uba dei ruh u General Secretary ka Krishak Mukti Sangram Samiti, ula ong ba kane ka jingleh u Myntri Sorkar ka lah ban buh jingma ïa ka mrad namar ba u Atul Bora um dei u briew uba tip haba ïadei bad ki rukom sumar ïa ki mrad bad kane ka jingleh jong u ka dei kaba khring ïa ka jingshah pynsajia katkum ki kyndon aiñ.
U heh Ophisar na Golaghat Police Station ula pynthikna ba ki Pulit ki la ïoh ka jingujor hynrei ka ejahar kam pat poi sha ki namar kata ki khlem pat Register case hynrei ka jingtohkit ka la ïaid shakhmat.
Ka jingleh u Myntri ka la wanrah ka jingïathir ha ki Rynsan Social Media bad bun kila kylli, kumno u Myntri u ïoh ka bor ban ai injek ïa ki mrad.
Na ka liang u Atul Bora ula pynshai da kaba kam ba ula ai injek ïa ki mrad naduh ba u dang khynnah kaba dei ruh kaba ki paidbah ka jylla ki shait leh.
