Naba ïakhaid duh ka Lajong ïa ka nam lahduh

Shillong, Risaw 19: Ka Nangkiew Irat ka la pynkut noh ïa ka jingkyrmen jong ka Shillong Lajong ban ïada ïa ka nam lahduh ha ka Shillong Premier League hadien ka jingïalehkai kaba jur bha ha ka janmiet jong ka sngi Saitjaiñ, 18 tarik Risaw, ha First Ground-SSA Stadium, Polo, kaba la kut ha ka jingïakhaid khlem da don ba lah pynkhihjar (0-0).
U Akash Thapa, rnongap kol jong ka Nangkiew Irat, u la paw kum u rangïalehkai ba kongsan tam ha kane ka jingïakhun, ha kaba u la shah pynbor bunsien ban wanrah ïa ka jingïalehkai kaba kyrpang jong u ban kerda bad kyntait ïa ki jingpyrshang thep kol na ka liang pyrshah (Lajong). U Akash Thapa, uba shong ben ha kiba bun ki jingïalehkai jong kane ka samoi, u la shah pynrung ha ka thup jong ka kynhun ba sdang (Starting XI) tang ha ki ar tylli ki jingïalehkai ba la dep hynrei u la lah ban tyngshaiñ ha kiba bun ki khep ha kane ka jingïakhun.
Kane ka resol ka mut ba ka Lajong ka la pynkut ïa ka samoi ïalehkai da kaba khur 19 poiñ, kaba la biang ban wan ha ka kyrdan ba-ar ha kane ka por hynrei kam pat biang ban rah ïa ka nam lahduh. Kumba ka paw, mynta dei ka Langsning kaba ïalam hakhmat da kaba kamai 20 poiñ hynrei ka Mawlai (18 poiñ) ka dang don ka lad lada ka lah ban pynliem ïa ka Rangdajied United ha ka jingïalehkai ba khatduh ban pynkut ïa ka samoi ha kane ka sngi Nyngkong.
Shuwa kane ha ka jingïalehkai kaba nyngkong, ka Sawmer ka la lah ban pynneh ïa ka jingïakhun jong ka ha kawei pat ka SPL hadien ba ka la pynliem noh ïa ka Malki da 3-1 kol. Kiba la pynkhihjar na ka bynta ka Sawmer ki long u Diego Khyriem (32’), Michaelson Kurbah (45’) bad u Khainkupar Iawphniaw (84’). U Fashioning Syngkli (87’) u la pynphai shi kol na ka bynta ka Malki hynrei ka jingshah rem ka mut ba kan shah pynhiar noh sha ka First Division ha ka aïom lehkai ban wan.
Kaba la pynlong ïa ka resol jong jingïalehkai hapdeng ka Lajong bad ka Nangkiew Irat kaba kham phylla shuh shuh ka long ba ka Nangkiew Irat ka la ïalehkai jan shi kynta da tang 10 ngut ki rangïalehkai hadien ba u Khangmiki Pale u la shah beh namar ba u la shah pynshitom haduh ar tylli ki yellow card.
Kane kadei ka jingïakhaid kaba khlem kol kaba ar ha kane ka aïom 2025 baroh kawei, ha kaba kawei pat ka dei kaba la ïakhun hapdeng ka Lajong bad ka Rangdajied ha ka jingïalehkai kaba 3. Ka long kaei kei kaba sngewsih ïa ka Lajong namar ym pat don kano kano ka kynhun kaba lah ban pynliem ïa ka haka SPL 2025, hynrei ka jinghiar poiñ kadei namar saw tylli ki jingïakhaid ba ka la mad, kaba long ka daw bah kaba la khanglad ïa ka ban rah biang ïa ka SPL.
Kane ka jingïakhaid ka bym shym la poi pyrkhat ka mut ba ka rai kano ka kynhun ban rah ïa ka nam lahduh ka shong ha ka jingïakhun jong ka Mawlai bad ka Rangdajied, ka ban long ha ka por 4:15 baje janmiet mynta ka Lah sngi U Blei. Ha ka jingshisha, kane ka jingïalehkai kadei ban long ha ka 09 tarik u Risaw hynrei la hap ban pynkynriah noh namar ka jingjur palat u slap ha katei ka sngi. Lah ban ong ba ki ban pynleit jingmut bha ïa kane ka jingïakhun kin dei ki rangïalehkai ka Langsning, ki ban kitbok kitrwiang ïa ka Rangdajied ba kan jop.
Ka jingjop ïa ka Mawlai kan ai ïa ki ïa ka nam lahduh kaba lai ha ka SPL. Kumjuh ruh, lada jia ba ïakhaid ne shah rem kan pynlong ïa ka Langsning ban rah ïa ka nam lahduh ha ka sien kaba lai.
Ha kawei pat ka liang, ka Rangdajied ka don ïa la ka jong ka thma ban ïakhun. Ka jingjop jong ka Sawmer ha ka sngi Saitjaiñ ka la pynlong ïa ka RUFC ban hiar sha ka kyrdan kaba hynriew ha ka miej. Kumta ka donkam ïa ka jingjop lane ïakhaid ba kan lah ban kyntiew biang ïa ka kyrdan jong ka ha ka miej.