Na West Jaiñtia sdang pynbna kyrtong ka UDP, da u MDC sei pyrshah ïa u Bah Sngiawbhalang

Shillong, Naitung 07 : Ka UDP West Jaiñtia Hills District ka la dei ka distrik kaba nyngkong ban phah ïa ka thup kyrteng jong ki kyrtong ban aireng ha ka elekshon MLA kaban long ha u 2023.
Ïa katei ka thup kyrteng, ki nongïalam jong ka UDP-WJH ki la aiti ha u General Secretary ka State Election Committee ka party, Dr. Jemino Mawthoh ha ka jingïalang kaba long ha kane ka sngi Balang ha nongbah Shillong.
Katkum katei ka thup kyrteng, na ki san tylli ki constituency, ka UDP-WJH ka la phah shwa lai tylli ki kyrteng, kata ka kyrteng jong u Bah Dawan Lyngdoh, u kyrtong ban aireng pyrshah ïa u Myntri ka tnad Urban Affairs, Bah Sniawbhalang Dhar, nangta jong u Bah Moonlight Pariat kyrtong na Jowai ban aireng pyrshah ïa u Bah Wailad Shylla na ka NPP bad ruh ka kyrteng jong u Bah Nujorki Sungoh uba la dei lypa u MLA ba mynta jongka UDP na Mookaïaw.
Haba kren bad ki lad pathai khubor hadien ba la dep ban aiti ïa katei ka thup kyrteng, u Dr. Jemino u la ïathuh ba kaba sah mynta kadei sa tang ka Raliang bad kumjuh ka Amlarem kaba mihkhmat da u MLA ka UDP hi, Bah Lahkmen Rymbui ba dei ruh u Myntri Kampohïing ka Jylla.
Utei u heh ka UDP, u la ong kumba ki ju leh barabor, ki MLA jong ka party ki la dei lypa ki kyrtong na kato ka constituency tangba hap pat ban bud ïa ki kyndon jong ka state election committee.
“Ka jingpynbeit na ka party ka long ban ailad beit ha ki trai constituency ban jied ïa ki kyrtong bad ka shong ha ka jingstad jong ki Circle ban jied ïa ki kyrtong kumba leh kine ki lai tylli ki constituency,” u la ong da kaba bynrap ba namar kitei ki circle ki phah beit tang kawei ka kyrteng kumta, kitei hi ki la dei lypa ki kyrtong jong ka party.
“Tangba kane ka shong pat ha ka state election committee ban shim ïa ka rai kaba khatduh,” u la bynrap biang.
Kumba long mynta hi, na kitei ki lai constituency, kaban kham shongshit ka dei ka Nartiang namar ka UDP ka jied da u MDC, Bah Dawan Lyngdoh ban aireng pyrshah ïa utei u heh ka NPP ba bat ruh kum u Myntri ka sorkar jylla. Ym tang katta, utei u samla u la ïathuh ruh ba ka rai jong u ban ïakhun ïa katei ka elekshon ka long beit da ka jingjied ym da ka bor ban pynbiej da ka spah.
“Ha baroh ki elekshon ha ka jylla ka pisa hi kadei kaba hakhmat, hynrei nga pat nga kwah ban pynsngewthuh ïa ki paidbah ba ka por ka la dei ba kim dei ban buh shwa da ka pisa shwa ban thep vote,” u la ong.
Nalorkata, u la ong ruh ba mynta u la pynshai kylleng ba un ïakhun khlem ka bor jong ka pisa hynrei da ka jingieid jong u paidbah.