Na West Bengal lap ki Pulit ïa ka samla lud kaba jah na St. Margareth HSS, Laitukhrah

Shillong, Jylliew, 13: Ki Pulit jong ka nongbah Shillong ha ka Lah Sngi U Blei ki la lap ïa kawei ka samla lud kaba la jah rngai la shiphew sngi kynthih na St Margareth Higher Secondary School, Laitumkhrah, Shillong na kawei ka jaka kaba don ha ka Jylla West Bengal.
Kane ka samla lud kaba la 17 snem ka rta, ka dei kaba sah ha Upper Mawprem, Shillong.
Kane ka samla ka la jah rngai naduh ka 2 tarik mynta u bnai napoh ka skul St Margareth Higher Secondary School, Laitumkhrahm la pyntip u Superintendent of Police ka East Khasi Hills u Bah S. Nongtnger ha u kyrwoh ba la phah sha ki lad pathai khubor.
U kyrwoh u la pyntip ba ki Pulit jong ka Laitumkhrah Police Station ki la register case halor kane ka jingjia hapoh ka kyndon 363 Indian Penal Code (IPC) bad ki la pynlong ïa ka jingtohkit tad haduh ban lapdien ïa ka leit ka wan jong kane ka khynnah.
U SP u la pyntip, ki Pulit ka East Khasi Hills District kiba la lap ksai halor kane jingjia hapoh ka jingïalam u Sub Inspector Md Kayum, ki la hiar sha ka Jylla West Bengal ban leit wad ïa kane ka samla lud.
Dei ha ka 12 tarik mynta u bnai ba ki Pulit ki la lap ïa kane ka samla lud na ka sor Malda, West Bengal ha kaba ki la wan ïalam noh ïa kane ka samla lud sha Shillong bad aiti noh ïa ka sha ki bahaiing hasem.