Shillong, Risaw, 22: Ki Pulit jong ka Anti Narcotic Task Force (ANTF) East Khasi Hills kiba la ïoh jingtip na ki tnat syntiat ha ka Lah Sngi U Blei ki la pynap shrip bad ïohkem ïa u Mastak Ahmed Mazumder, 26 snem ka rta bad ïa u Hanif Ahmed Laskar 29 snem ka rta na Mawryngkneng.
U kyrwoh ba la phah da u Superintendent of Police ka East Khasi Hills u Bah S. Nongtnger u la pyntip ba na ka met jong u Mastak Ahmed Mazumder ki Pulit ki la ïoh ban kurup san tylli ki synduk thep sabon ba la thep ïa u powdar rong stem ba la suba ba u dei u drok uba khia 56.93 gram, kawei ka mobile phone, kawei ka Voter ID card, kawei ka PAN card, kawei ka pla rongïong.
Na ka met jong u Hanif Ahmed Laskar ki Pulit ki la ïoh ban kurup kawei ka pla plastik rong blu ba la thep 196 tylli ki suba dawai kuli Yaba kiba khia 19.16 gram, kawei ka mobile phone, kawei ka patlun Jeans rong dpei, kawei ka pla rong iong, kawei ka Voters ID card, kawei ka PAN card.
Ha kaba ïadei bad kane, ki Pulit ki la register case ha Mawryngkneng Police Station hapoh ka Section 21(b)/22(b)/29 NDPS Act bad ka jingtohkit ka dang ïaid shakhmat.
Ha ka janmiet sngi Baar ki Pulit ka Anti Narcotic Task Force (ANTF) ka East Khasi Hills District ki la ïoh saw ngut ki nongkhaiï drok bad na kine lai ngut ki dei ki kynthei bad uwei u shynrang.
Ki Pulit ki la buddien ïa kine ki nongkhaiï drok naduh na Oakland naduh ka por 5:00 baje janmiet bad hadien ba ki la i shankhmat ki la bud ïa ki shaduh Umsohsun bad ban ïoh bat syndon ïa ki.
Ki Pulit ki la ïathuh ba ki la ïoh ban kurup bun u drok, nalor ka pisa na kine nongkhaiï katba ki dang die ïa u drok ha surok ka shnong Umsonsun.
Ha kane ka jingïoh bat ïa kine ki nongkhaïi drok la sakhi lang da ki nongkitkam jong ka Dorbar Shnong Umsohsun bad ki Pulit Ophisar kiba la wan na Sadar Police Station.
Kat haduh ba la thoh ïa kane ka khubor ki Pulit kim pat lah satia ban ai jingkheiñ halor ka jingïoh kurup ïa u drok namarba ki dang pyndep ïa ki jingtohkit katkum ka aiñ.
