Na u Myntri Rangbah ka jylla ïoh pdiang khusnam ka kynhun ANTF Ri Bhoi ba ïoh kurup drok bun

Nongpoh, Naitung 01: Kum ka jingbteng ka sorkar jylla ryngkat ka tnad pulit ban ïalehthma pyrshah na ka jingkynrei jong u drok hapoh ka jylla bad ka long pat ka jingai mynsiem ïa ki bor pulit ha kaba ka kynhun ANTF na Ri Bhoi ka la ioh pdiang ïa ka khusnam (Appre-ciation Award) na ka sorkar ha kaba la sam da u Myntri rangbah ka jylla, u Conrad K. Sangma.
Kane ka jingioh pdiang ka kynhun ANTF na Ri Bhoi, ka dei ha ka 26 tarik u Jylliew 2023 ba la rakhe ïa kata ka International Day Against Drug abuse and Illicit trafficking kaba la long ha Nongbah Shillong bad la sam bad ai burom hi ruh da da u Myntri Rangbah ka jylla, u Conrad K. Sangma ha ka jingdon ryngkat u Symbut Myntri ka jylla, u Bah Prestone Tynsong, u DGP ka Meghalaya, u Dr. L.R Bishnoi bad kiwei kiwei ki heh ophisar ka jylla.
Ha katei ka sngi ki lai tylli ki kynhun ANTF nalor ka ANTF Ri Bhoi kaba la ioh pdiang ïa ka khusnam bad ki ar tylli ki kynhun ANTF pat ki kynthup ïa ka East Jaintia Hills bad ka East Khasi Hills District Police.
Haba ïa kren bad ki Nongthoh Khubor ka District, u SP ka Ri Bhoi, u Giri Prasad, u la ong ba ka tnad Pulit na Ri Bhoi ka pynpaw ka jingsngewkmen halor ka jingioh pdiang ïa kane ka khusnam bad kane ka jingioh pdiang ïa kane ka khusnam ka dei ka jingai mynsiem ïa ki bor pulit ka Ri Bhoi bad ka jylla hi ban dang bteng ka jingïaleh thma pyrshah ïa ka jingkynrei jong u drok uba la ktah ïa kiba bun ki khun samla bad ïa ka imlang ka sahlang.
U la ong ruh kane ka jingioh pdiang ka kynhun ANTF na Ri Bhoi ïa kane ka khusnam ai mynsiem da ka sorkar kan ai mynsiem ruh khamtam ïa ki bor pulit ka Ri Bhoi, namar ka Ri Bhoi ka dei ka khyrdop ban rung sha ka jylla Meghalaya ha kaba bun ki nongkhaii drok beaiñ ki rung ki mih na kane ka surokbah ha Ri Bhoi.
Shuh shuh, u la bynrap ruh da kaba ong, ba ka tnad Pulit jong ka jylla hi baroh kawei, ka kwah ban don ka jingïatrei lang na ka bynta ban ïalehthma pyrshah ïa u drok bad ka thong hi ka long ban wan rah ïa kata ka imlang ka shalang kaba lait na ka jingshah ktah ha u drok ba bun ki khun samla ki la ngop bad ki la shah ïalam bakla na ka jingkyrni ha une u jingdih basniew. U la khot la wer ruh ïa ki paidbah ka Ri Bhoi ba kin ai kata ka jingïatrei lang ban ïaleh pyrshah ïa u dro bad u kyrmen skhem ruh ba da ka jingïatrei lang ki paidbah ka bor pulit na Ri Bhoi kan lah ban ïa khun pyrshah na ka jingpynïaid iew beaiñ ïa u Drok, u la bynrap shuh shuh.