Shillong, Risaw 03 : Ka BJP Meghalaya hynne ka sngi Palei ka la kyntu ïa u Myntri Rangbah ka Jylla ba un tuklar lang halor ka jingkynnoh ba ka don jingbakla ha ka jingpynbna ïa ka result eksam kam jong ki staff nurse bad ki ANM.
“Ngi kyntu jur ïa u Myntri Rangbah ba un tuklar halor kane ka kam bad pyntikna ba ka jingthung kam ha ka jylla ka dei ban long ha ka lynti kaba khuid bad kaba shai khlem da don ka jingpyndik,” ong u General Secretaryka BJP Meghalaya ha ka kyrwoh.
Na ka liang utei u heh BJP u la kdew ruh shibun ki jingdkoh ha ka result ba pynbna dang shen kaba ïadei bad ki staff nurse da ka Meghalaya Medical Services Recruitment Board. U ong ba kane ka kdew ïa ka rukom pynïaid jong ka sorkar ïa ki eksam ïa khun kam kiba don pat ka jingma ïa ka lawei jong kiba bun ki khun samla kiba lah ban ktah pat ïa ka jylla ha ki por ban wan.
“Da ki hajar ngut ki khun samla kiba ieng lai ban ïoh kam sorkar ki thrang ban ïohi ïa ka rukom thungkam kaba khuid bad kaba hok na ki bor ba pynïaid ïa ki eksam thung kam kum ka MPSC lane ka MMSRB ba kin lait na ka jingleh thok….” u la bynrap biang.
Shuh shuh u ong ruh ba ki ïohi ba man ka sien ba ka sorkar ka pynbna ïa ka result ka don beit ka jingpyrshah na ki paidbah halor rukom pynlong ïa ki eksam bad kumjuh haduh ka result. U ong ruh ba kane ka wanrah ka jingartatien ai kito ki samla ba wad kam.
Katkum ka jingong jong u, ka lawei jong ka jylla ka don ha ka jingma lada kiba dei hok ban ïoh kin shah knieh noh ïa ka hok tang na ka daw kiba kum kine ki jingjïa kiba la paw pyrthei.
