Na u Myntri ka tnad Forest & Environment dawa ban pynkhie im biang ïa ka wah Kupli

Jowai, Jylliew 22: Ka Synjuk ki Waheh Shnong jong ka Iooksi bad Saphai ha ryngkat ka Khasi Student Union (KSU) Kupli Area Circle kila ai syndon da ka jingthoh sha u myntri ka sorkar jylla u James K. Sangma ba dei peit ïa ka tnad mariang, ba un ïarap ban pynkhie im biang ïa ka wah Kupli kumba ka long ha ki por mynshwa.
Katei ka kynhun ka kwah shisha ba pynkhe im biang ïa ka wah namar ka jingjaboh bad kylla acid ka um. na ka daw ka jingtih pathar ïa u dewïong, kaba la wanrah ruh ïa ka jingïap ki dohum dohwah bad ka jingkylla rong ka um.
La ong ba la donkam ba ka sorkar kan shim khia mardor ïa kane khnang ba kane ka wah Kupli kan neh kan sah, la ïathuh ba ka wah Kupli ka dei kawei na ki wah kaba la paw bha hapoh North East India hynrei mynta ka jingsdang jong ka jingshah pynjulor kala dang bteng katba dang mih ki sngi.
Na kane ka wah ki nongshong shnong ki ju im ja da kaba leit kwai ïa ki dohum dohwah bad leit die ïa ki ban pyndap ïa ka ïing ka sem, nalor kane ki don ruh kiba im da kaba ñiah lieng bad kiwei de.
Shuh shuh la ïathuh ha ki bynta ka wah ka don ruh ïa ka kshaid kaba la paw bha ka jingitynnad kaba la tip ka “ksaid Ialei” hynrei kane kala duh la dam noh naduh ba la wan ka NEEPCO Project.
kumba long mynta ha ki ruh jong ka wah ki don ki jaka jong ki riew shimet kiba itynnad kiba lah ban khring ïa ki jngohkai pyrthei na kylleng ki jaka
Wat na ka laing ka sorkar jylla lyngba ka tnad Tourism Department kala pynlut haduh Rs. 11,00,00,000/- (khadwei klur) na ka bynta ban pynitynnad ïa ka Iooksi Kupli Park kumta la dankam sa pynkhie im biang sa ïa ki bynat jong katei ka wah.
Na ka liang katei ka kynhun ki synjuk ki Waheh Shnong bad ka KSU kila dawa na u myntri ban pynïoh jingïarap pisa (scheme) na katei ka tnad lyngba ka Meghalaya Environment Protection and Restoration Fund (MEPRF) khnang ban pynitynnad shuh shuh ïa katei ka wah Kupli bad ban im lang ki nongshong shnong ka thaiñ.