Shillong, Naitung 08 : U Myntri ka tnad AH&Vet ka sorkar jylla, Bah AL Hek ba dei ruh ha kajuh ka por u nongïalam ka BJP ha Meghalaya ha ka sngi Nyngkong Sorkar Jylla u la kyntu ïa u Myntri Khynnah ka sorkar pdeng u George Kurian ba un ïa kren lang na ka bynta ban pynrung noh ïa ka Ktien Khasi bad Garo ha ka Khyrnit ba Phra jong ka Riti Synshar ka Ri.
Ïa kane u Bah AL Hek ula pynsngew ha ka jingïalang jong ka State Executive Committee ka party ba la wan ïa shimbynta da u George Kurian, kaba long ha ophis treikam ka BJP ha Bivar Road Shillong.
Kane ka dei ka jingïalang ba nyngkong jong ka State Executive Committee hadien jong ka elekshon Lok Sabha, kaba la ïadonlang u President ka BJP Meghalaya,u Rikman G Momin, u MLA ka South Shillong bad Chairman ka MTDC Bah Sanbor Shullai bad kiwei kiwei.
Haba kren ha kane ka sngi, u Bah AL u la ong, “Ka jingpynrung ïa kine ki ar tylli ki Ktien kan pynurlong ïa ka jingdawa ba la slem bha jong ki nongshongshnong ka jylla bad kan ïarap shikatdei eh ïa ki samla pule kiba na kyndong kynshrot ka Jylla”.
Na ka liang u George Kurian u la kren ruh halor ki skim bapher bapher ba la pynkhreh da ka sorkar pdeng hapoh ka jingïalam jong u Narendra Modi na bynta ka Meghalaya kynthup ïa ki skim ki ban pynjanai ïa ka kam ri jingri, ri dohkha bad kiwei kiwei.
