Na u Lat dawa ka JSU ban don noh da ka aiñ ban ïada shah thombor ïa ki briew na NE

Shillong, Lber 30 : Ka Jaintia Students Union Shillong Circle & Central Body ha ka jingïalam u Adviser Bah A Suchiang ha ka sngi Nyngkong ka la leit ban ai da ka dorkhar ha u Lat ka Jylla lyngba u Principal Secretary ha kaba ïa dei bad ka jingshah lehbeiñ ki briew na ka thain shatei lam-mihngi jong ka Ri ha kylleng ki bynta jong ka Ri India.
Ha kane ka dorkhas, ka JSU ka la kyrpad ïa u Lat ka jylla ban thoh bad ban ïa kren ïa kane ka phang bad ka Sorkar Pdeng ban shna ïa ki aiñ ban ïada ïa ki briew na ka thaiñ shatei lam-mihng jong ka Ri kum ka National Anti Discrimination Law.
Katkum ka kyrwoh, la ong ba ha kane ka National Anti Discrimination Law dei ruh ban kynthup ïa ki aiñ kiba khlaiñ kum kaba kren pynmong da ka ktien ba ki dei ban shah pynshitom da kaba set phatok 6 bnai bad ka kuna.
Nangta la ai jingmut ba na bynta kito kiba donkti ha kaba shoh ne pynmynsaw ki dei ban shah pynshitom da kaba set phatok 3 snem bad ka kuna.
Shuh shuh la ong ba kiba donkti ha kaba pynïap ki dei ban shah pynshitom da kaba set phatok shi jingim lane da kaba rai phasi.
Na ka Seng ha ka dorkhas ka ong ruh ba katei ka sienjam kan long kum ka stieh kaban ïada ïa ki paidbah ka thain shatei lam-mihngi jong ka Ri kiba leit pule lane leit kamai ha kylleng ki bynta jong ka ri da ka jingshngain.