Jowai, Nailar 02: Ka Jaiñtia Students’ Union (JSU) Nartiang Circle mynta ka sngi kala leit ban aiti da ka dorkhas ha u District Medical & Health Officer ka West Jaiñtia Hills u Dr. K.C. Ajar hadien ka jingïoh ujor na ki paidbah halor ka jingbym biang ki Doctor ba dei peit bad sumar ïa ki nongpang kiba wan shim dawai na ka Nartiang PHC.
Halor kane ka seng kala dawa jur na utei u khleih ka tnad ka koit ka khiah jong ka District ba un shimkhai mardor ïa kane ka kam, da kaba pynbiang kloi ïa ki Doctor hapoh ka Nartiang PHC ha kine ki sngi ban wan khnang ba ki paidbah nongleit shim dawai kin ïoh ka jingsumar kaba paka.
La ïathuh kiba buh ki nongshong shnong na katei ki thaiñ ki dei kiba dang duna ka jingïoh jingkot bad kan da long shisha ka lad jingïarap lada kin ïoh ka jingsumar ba biang na kane ka jaka ai jingsumar jong ka sorkar.
“Ka don ka por ba ki nongpang na katei ka thaiñ la hap ban pynkit noh sha kiwei de ki jaka sumar kiba jngai bad kane ka long ka jingduhnong kaba khraw namar ka jingjngai jong ka lynti’, la ong ka seng
Na ka liang u District Medical & Health Officer ula kular ha ki nongïalam ka seng ban buddien ïa kane ka kam bad ban ïakren sha ki bor ba dei peit ban pynbiang Doctor kloi ha katei ka PHC.
