Shillong, Jymmang 12 : Ka KSU ha ka sngi Palei ka la kynduh ïa u Myntri Rangbah ka Jylla ban kyrpad ba un tuklar lang halor ka jingshah klun noh ki jaka jong ki Khasi kiba sah ha Manipur.
Kane ka jingleit kynduh jong ka KSU, hapoh ka jingïalam jong u General Secretary ka Seng, Bah Donald V Thabah, kadei hadien khyndiat sngi ba ka Seng ka la hiar hi dalade sha katei ka jylla ban kynduh markhmat ïa u Myntri Rangbah ka jylla Manipur u Biren Singh kumjuh ïa ki nongshong shnong kiba ngat ha katei ka jingshah klun jaka ha ki poi-ei kaba hap ha Khedagar Khasi Punji ha Tamenglong.
Katkum ka kyrwoh, ka Seng ka ong ba na ka liang u Myntri Rangbah ka Jylla mar mar u la kular ba un sa kren bad thoh sha u Myntri Rangbah ka Manipur ban pynkloi noh ïa ka jingkyndang ïa kitei ki poi-ei kiba wan ban klun ïa ki jaka jong ki Khasi.
