Na u CM pan jaka ka NPWF ban tei ïa u durmot ka Phan Nonglait ha Phan Nonglait Park

Shillong, Nailar 07 : Ka National People’s PartyWomen’s Front – Meghalaya Unit hapoh ka jingïalam jong ka President Kong Grace Kharpuri ha kane ka sngi Palei ki la kynduh ïa u Myntri Rangbah ka Jylla Conrad K Sangma ban pan jaka na ka sorkar na ka bynta ban ïoh pynieng ïa u durmot jong ka Phan Nonglait ha Ka Phan Nonglait Park.
Ha kane ka jingïakynduh ïa u Myntri Rangbah la donlang ruh kiwei pat ki nongkitkam jong ka Women’s Front ryngkat ka jingsynran lang jong u Working President ka National People’s Party, Bah Hamlet Dohling kumjuh u Nongai Ktien ka Party, Bah HM Shangpliang nalor kiwei kiwei.
Ka Women’s Front ka la pynsngew ruh ha u Myntri Rangbah ba kum ka kynhun jong ki Longkmie NPP ki kwah ban pynieng noh da u durmot jong ka Phan Nonglait, kum ka burom ïa ki kam ba shlur jong kane ka khlawait.
“Na ka liang ka NPWF Meghalaya State Unit ngi kwah ban pynieng da u durmot jong ka Phan Nonglait, kawei na ki khlawait ba shlur jong ka jylla jongngi kum ka burom ïa ka jinglen lade jong ka bad ruh kum ka dak ka jingpynkynmaw ïa ka jingnoh synniang ba ki longkmie ki la buh dak ha ka roi ka pa jong ka Meghalaya khamtam bad kumjuh ha ka ri baroh kawei,” ong NPWF.
Kumta, halor kane, na ka liang ka Women’ Front ka la kyrpad ruh ïa u Myntri Rangbah ban ai jaka ha Ka Phan Nonglait Park kaban long ka jaka kaba paka tam eh ban pynieng ïa u durmot kaban long artad ka jingai burom ïa ki kam shlur jong ka.
Na ka liang u Working President ka Party Bah Hamlet Dohling u la ïathuh ba ha ka jingïakren na ka liang u Myntri Rangbah u la pynpaw ïa ka jingkmen kaba khraw halor kane ka jingtyrwa kaba wan na ka NPWF.
“U Myntri Rangbah u la ai ka jingïaroh ïa ka Women’s Front kaba la poi kynmaw ban leh burom ïa ka Phan Nonglait ka riewshlur bym riej kaba ieng ban ïakhun ïa ka bor ki nongwei kaba long ruh ka dak ba haduh katno ka ieid ïa ka Ri bad ka Jaidbynriew,” la ïathuh u Bah Hamlet.
Nangta u la ïathuh ruh ba na ka liang u Myntri Rangbah u la kular ruh ba ka sorkar kan sa shong bishar bniah halor kane ka jingtyrwa kaba don jingmut kaba wan na ka NPWF.
Kumban shu kdew hangne, kane ka mat ka la mih ha ka jingialang kynmaw burom jong ka NPP Meghalaya ia ka lyngkhuh sngi iap jong u Tirot Sing Syiem ha phyllaw jong ka State Central Library Shillong ha u bnai ba la dep. Ha kane ka jingialang ka President jong ka NPWF Kong Grace Kharpuri ka la ong ba kum ka party ki hap ban leh ei ei ban leh burom lang ia ka Phan Nonglait namar ma ka ruh ka don ka bynta kaba khraw bha ha ka jingiakhun ryngkat ryngkat bad u Tirot Sing pyrshah ia ki nongwei ha kato ka por.
Bad dei ha katei ka jingialang ba ki nongialam ba hakhmat ka party naduh u Bah Hamlet Dohling kumjuh u Bah HM Shangpliang ki la mynjur ia kane ka jingai jingmut bad ong ruh kin sa shong pyrkhat ban ioh pynsngew pat sha u Myntri Rangbah ka jylla.