Shillong, Nohprah 09 : Ki paidbah Khasi ba shong ba sah ha ka Jylla Mizoram hapoh ka lama jong ka Khasi Welfare Committee (KWC) Vairengte, Mizoram, ka la kynduh ïa u Myntri Rangbah ka jylla Meghalaya, u Conrad K Sangma ban tuklar lang halor ka jingeh kaba la sahteng la slem bha kaba ïadei bad ka jingslem ban ïoh ïa ka jingithuh ïa ki jaka kaba ki shong ki sah.
Ha kane ka jingïakynduh kaba la synran lang da ki nongïalam jong ka KSU na ka liang u President ka KWC u Vailat Sutong u la pynpaw ïa ka jingsngewkhia halor ka jingbym thikna bad ka jingeh kaba ki longiing ki ïakynduh namar ka jingpynslem ban ai ïa ka Land Settlement Certificate (LSC) da ka sorkar Mizoram.
“Ka mat kaba nyngkong bad kaba kongsan tam ka dei ka mat kaba la sahteng slem bha ha kaba ïadei bad ka Land Settlement Certificate kaba hap ban ai da ka Jylla Mizoram. Kane ka mat ka la wanrah ïa ka jingbym thikna bad jingeh kaba khraw na ka bynta kiba bun ki longïing bad ka donkam ïa ka jingtuklar kyrkieh bad ka jingïatreilang hapdeng nongsynshar ba ha khlieh duh ban wad ïa ka jingpynbeit kaba kham bha,” ki la pynpaw.
Na ka liang ka KSU hapoh ka jingïalam jong u General Secretary, samla Donal V Thabah u la ong ba ki Khasi na Mizoram ki dawa ban ïoh ïa ki kot ki sla jaka khnang ba kin long trai noh ïa ki jaka ba ki sah mynta ha Mizoram naduh ki snem 1920.
“Ki Jaidbynriew Khasi ki la im hapoh ka Jylla Mizoram naduh ki snem 1920 hashuwa baka Ri India ka ïoh laitluid bad hashuwa ba ka Jylla Mizoram ka ïoh ïa ka Jylla ba pura. Kumta ki la don hok ban ïoh jingithuh noh da kaba ïoh ïa ki kot jaka na ka Sorkar Jylla Mizoram,” u la ong.
Na ka liang u Bah Paul teibor Miki Pajat u la ïathuh ba ki don palat spah tylli ki longiing Khasi ha Mizoram. “Ngi donkam ban ïoh noh ïa ki kot jaka khnang ban long trai ïa ki jaka ki puta ha ki jaka ba ki sah ha Mizoram”, u la ong.
Ka kynhun ha kane ka jingïakynduh ka la pan jingïarap pisa ruh na ka bynta ban tei ïa ka iing dorbar kaba long kum ka jaka kaba kongsan bha na ka bynta ki kam pynroi ïa ka imlang sahlang, ka kolshor bad kumjuh ha ki kam pynroi ha shnong ha thaw.
