Na u CEM ka JHADC kyntu u ma K.L. Pariat ban ithuh noh ïa baroh ki kur hapoh ka Ri-Lum Jaiñtia

Jowai, Naiwieng 01: Uwei na ki nongshong shnong na nongbah Jowai uba dei ruh u nongtreimon sngewbha ha kaba ïadei bad ka jingkhuid jingsuba jong ki sawdong sawkun jong ka Wah Myntdu u ma Khroo Lamsalanki Pariat, mynta ka sngi ula aiti ïa ka shithi bad kyntu na u Chief Executive Member (CEM) ka Jaiñtia Hills Autonomous District Council (JHADC) ban pyntreikam da ka aiñ ban ithuh noh ïa baroh ki kur hapoh ka Ri-Lum Jaiñtia kaba long katkum ka riti synshar 6 (Six) Schedule.
Utei u rangbah ula pynpaw ha ka shithi ba kane ka jingdawa ka long kum ka lad ban ïada na ka jingwan thyllep jong ki briew kiba nabar jong ka jylla bad na kiwei de ki Ri ba marjan, kiba la sdang ban pyndonkam bakla da ka jait ka kynja jong ka jaitbynriew ka Ri-Lum Jaiñtia bad u ong lada ka JHADC kan pyntreikam noh ïa ki kyndon aiñ kan long ka lad jingïarap shibun eh ïa ka jaitbynriew.
Shuh shuh ula pynkymmaw ba katkum ka jingpynkup bor ïa ka Council hapoh jong ka 6 Schedule jong ka riti treikam jong ka Ri India ka long ban peit naduh ka khyndew ka shyiap, ki lum ki wah, ka synshar ki Dolloi, ki waheh Shnong bad wat ïa ki dak thoh Pnar ula pynkymmaw la dep monjor ban pynlong aiñ da ka Council.
Katkum kane ka shithi jingdawa jong u ma Pariat na ka JHADC ula pynithuh ba ki don haduh 191 tylli ki jait kur hapoh u pud u sam jong ka Council, ula ong dang lah shuh ban don sa kiwei de ki kur bym pat ïoh jingtip.
Hadien ba la dep aiti ïa katei ka shithi ha u CEM ha ryngkat ka jingdonlang u EM ma Phasmon Dkhar, u ma Pariat ha ka jingkren sha ki lad pathai khubor, ula ong ba hapoh ka Ri-lum Jaiñtia ki don da ki kur ki jait kiba seng ïa ki shnong ki thaw hynrei na ka liang ka District Council la kumba 70 snem haduh mynta kam pat ithuh ïa ki jait kur hapoh ki pud u sam ka JHADC.
Ka la dei ka por ba ka Council ne u Dolloi ban ithuh noh ïa ki jait kur na ka bynta ka jingshngaiñ jong ka pateng kaba dang wan la ban jur u ma Pariat namar kiba bun na ki bar jylla kila shim noh ïa ka jait ka kynja da kaba u ai nuksa ïa ka jait Pariat kumba long mynta la don sa ka KharPariat bad kane ka jia na ka jingbym don ka aiñ ka kyndon ban teh lakam da ka District Council.
Hadien ka jingïakynduh bad u CEM ka JHADC ma Thombor Shiwat u ma Pariat ula pynpaw ka jingsngewkmen ba na ka liang jong u CEM ruh ula kular ban ïatreilang bad kane ka jingdawa ban pynithuh noh ïa ki kur kiba don hapoh u pud u sam jong ka Council namar wat ïa ka aiñ ban ithuh ïa ki Waheh Shnong bad Dolloi kala treikam pura mynta.
Ula kyntu jur ïa ka Council ba kan pynkloi noh ïa kane ka kam bad wat ap shuh haduh ban da poi ka hukum na ka ïing bishar ba donburom pyrshah ïa ka Council ban pynithuh ïa ka kur ka kynja’, shuh shuh ula pynsngew ba ha KHADC kala don kata ka aiñ ban ïada kaba ki khot ka “Khasi Social Custom of Lineage, Second Amendment Bill, 2018”.
‘Na ka bynta ban im ka kur bad ka jait bynriew’ lada ka Council kam lah ban pyntreikam ïa kane na ka liang u ma Pariat ha ryngkat ki paralok kim bamse ban leit ujor syndon da ka PIL sha ka ïing bishar donburom ka jylla khnang ban pynskem ïa ka jinglong jingman jong ka jait bynriew.