Jowai, Lber 28: Hadien ka jingpynskhem ïa kawei na ki shnong Myntdu kaba hap hapoh ka Elaka Jowai da u Dolloi ma Puramon Kynjing ha kane ka sngi saitjaiñ, na ka liang ka Hynñiewtrep Integrated Territorial Organization-Khliehtyrshi Area (HITO-KA) mynta ka sngi kala leit phah da ka jingthoh sha CEM ka Jaiñtia Hills Autonomous District Council ban dawa pyndam (Cancel) noh ïa katei ka jingthaw shnong thymmai kaba la tip kum ka ‘Myntdu’.
Katkum katei ka shithi ba la phah la ong ba ka seng kam lah ban pdiang ïa katei ka jingleh namar wat na ka liang ka shnong Khliehtyrshi ruh kam tip shatia ïa katei ka jingthmu ban thaw shnong thymmai.
La pynsngew ba ka shnong Khliehtyrshi ka dang hap hapoh u pud jong ka Elaka Jowai kaba don tang uwei u Waheh Shnong, kumta lada don ka jingthmu ban seng shnong dei ban wanrah da ka jingpynsngew paidbah bad da ka jingmynjur lang jong ka Dorbar Shnong baroh kawei.
Halor kane ka HITO-KA ka dawa na ka JHADC lyngba ka sngi ban pyndam noh shi syndon ïa katei ka jingseng shnong thymmai, pynkut ka kyrwoh na u President ma Samely Shylla bad na u Secretary ma Lakhon Dkhar.
