Nongpoh, Risaw 25: Saw ngut ki mynder Bangladeshi kiba la rung tuh na ka khappud India ha ki bynta jong ka Sylhet Zero Point ki la shah kem ha ki Pulit jong ka Ribhoi District ha ka sngi Thohdieng da ka jingïatrei lang bad ka G-Branch ka tnat shipai BSF, Meghalaya.
Lyngba ka jingai jingtip kaba bniah da ki tnat syntiat ki shipai BSF, ki Pulit ka Ribhoi kiba la ap ktem ha Byrnihat ki la ïoh ban pynsangeh ïa kawei ka Bus Tourist kaba don ïa u nombar AS-01-GC-1071 ha kaba la ñiah da u Md Ali Hussain na ka Dhubri District, Assam bad na kane ka Bus ha ka jingtalasi la ïoh kem ïa ki saw ngut ki mynder Bangladeshi kiba la wan rung tuh sha India lyngba ka jylla Meghalaya.
Ki saw ngut kiba la shah kem ki dei kiba la tip kyrteng kum u Md Mintu, 39 snem uba sah ha Baroikhali, Barishal District, Bangladesh, u Md Runel 31snem na ka shnong Gupchor, Dhaka District Narayanganj, Bangladesh, u Johirul 29 snem na ka shnong Gupchor, Dhaka District Narayanganj, Bangladesh bad u Md Bilal 37snem na ka shnong Kamalpur, Kochbar Police Station, Brahmanbaria District, Bangladesh.
U Superintendent of Police jong ka Ri Bhoi District u Jagpal Singh Dhanoa u la ïathuh ba na kine ki saw ngut ki mynder Bangladeshi la ïoh kurup ïa ki kot ki sla ba la shu shna thok bad 3 tylli ki mobile phone.
Ïa kine ki saw ngut ki mynder ri ki Pulit ki la pyngngat ha ki kyndon aiñ ba la register case ha Nongpoh Police Station.
