Mawkyrwat, Ïaïong 30: Kawei ka longkmie kaba la don kumba 26 snem ka rta ka la mynsaw jur hadien ba ka la shah ot na u ryndang ha uwei u runar uba dei na ka shnong Thangrai-Nongnah, South West Khasi Hills District.
U Superintendent of Police jong ka South West Khasi Hills District Bah B. Jyrwa ha u kyrwoh u la pyntip ba kane ka jia ha ka sngi Balang ha ka por kumba 3:00 baje noh phai sngi.
“U nongleh ïa kane ka kam runar u dei uba la tip kyrteng u Jacinth Sanglyne na ka shnong Nongnah-Nongkdait ïa uba ki Pulit ki la kem noh ïa u,” ong u SP.
Tang shu ïoh jingtip halor kane ka jingjia, ka kynhun ki Pulit na Ranikor Police Station ki leit mar mar sha ka jaka ba la jia bad kem noh ïa u runar uba donkti na ka shnong ba u sah bad na ka iingsah jong ka longkmie la shah ot ryndang ki Pulit ki la ïoh kurup ruh ïa ka tari ba la pyndonkam da u runar.
U la ïathuh ruh ba ïa ka longkmie kaba la mynsaw jur la pynkit noh mar mar sha Civil Hospital Mawkyrwat bad mynta ka dang don hapdeng ka jingshah sumar.
Ki Pulit ki la registar case ha Mawkyrwat Women Police Station bad ka kynhun jong ka Crime Scene Unit bad ka Fingerprint Unit Team ki la leit ban lum ïa ki sakhi sabut na ka jaka ba la shah ot ryndang ka longkmie.
