Na pla hap sei ka bai sumar lada ym pynïasoh ïa ka MHIS bad u Aadhar :Health Minister

Shillong, Ïaiong 15 : Ka Myntri ka Koit ka Khiah jong ka sorkar jylla, Dr. M Ampareen Lyngdoh ha ka sngi Ba-ar ka la pyntip ba ki la don haduh 80 persen ki nongshong shnong ka jylla kiba la dep ban pynïasoh ïa ka Meghalaya Health Insurance Scheme (MHIS) bad u Aadhar.
Haba kren bad ki lad pathai khubor, ka Myntri ka la ong, “Ngi la lah ban pynrung bun bha ha ka MHIS. Ka sien ba khatduh ba nga buddien bad ki ophisar halor kane, ka la poi haduh 80 persen. Hanga hi kane ka la bun bha tangba ym baroh pat kiba la dep ban pynïasoh. Kumta haba ki kem pang hangta hi ka jingeh ka mih.”
Da kaba pynshai biang ba ka jingpynïasoh bad u Aadhar kadei kaba kongsan bha ban ïoh ïa kine ki skim, ka Myntri ka la bynrap biang da kaba ong, “Ngi kyntu jur ïa ki paidbah jongngi ba kito kiba kwah ban ïoh ïa ki jingmyntoi na ka MHIS Scheme jong ka sorkar Meghalaya sngewbha pynïasoh noh ïa u Aadhar khnang ba ha ka por ba phi donkam ïa ka jingtuklar jong ka sorkar kan dei kaba la biang lypa bad phin sa ïoh ban pyndonkam ïa ka.”
Nangta, ka la ïathuh ruh ba ki la pyrshang ruh ïa ki sienjam ban kyntiew ïa ka jingpynïasoh ïa u Aadhar. Katkum ka jingïathuh jong ka, man ki jaka ai jingsumar yn sa pynïasoh lut bad u Aadhar. “Ngi dang ïa leh ïa kane ka ka bad baroh ki tnad ba dei peit, ki Block, ki DC Office ban pyntikna ba ki nongshong shnong kin lah ban rejistar ïalade bad ka MHIS jong ka sorkar jylla.”
“Na kaei kaba ngi lah ban ïohi ki paidbah ki la sdang wan ban rejistar hynrei don ki khep ba ki paidbah ki kem pang jur khlem pat pynïasoh pat sha u Aadhar bad ka MHIS. Kumta kane kan ktah na ka pla jong ki hi ïa ka bai sumar kaba long pat ka jingeh kaba khraw ïa ki bahaiing ban pyndap.”
Da kaba pynshai pat ba ka sorkar kam lah ban pynbor ïa ki nongshong shnong ban ïoh ïa ka card MHIS, ka Myntri ka la ong, “Hynrei lada phi kwah kumta, kane ka lad ka don. Ki nongïoh jingmyntoi, kiba la ïoh jingmyntoi na kane ka skhim hi kin ieng sakhi ïa ka jait jingïarap kaba ka sorkar Meghalaya ka ai na ka bynta ki nongshong shnong. Ka long tang ban ïoh jingmyntoi.”
Shuh shuh ka ong ruh ba ka dei ïa ki paidbah ban ïohi ïa ka jingshisha. “Ngi la dep pynshai ïa ki jingmyntoi na ka jingpynïasoh ïa u Aadhaar na ka bynta ban ïoh ïa kiwei pat ki skhim bapher bapher.”
Kumta, ka la ong, “Mynta ka sngi, lada don ki nongshong shnong kiba kem pang ngin pyrshang katba lah ban pynbiang ïa ki jingpynïasoh Aadhaar na ka bynta u nongpang wat haba ki dang sah ha hospital.Hynrei lada jia pat ba ym don mano mano na ka longïing kiba la pynïasoh ïalade na ka bynta u Aadhaar lyngba kiwei pat ki skhim te kan eh bha ban ïoh ïa kane ka skhim.”