Na ophis phah wan shim takma hi ka MSOA ïa ki nongïalehkai Athletics

Shillong, Jymmang 08: Ki nongïalehkai Athletics shynrang bad kynthei kiba la jop ha ka jingïakop mareh 4×1 Relay Race jong ka kyrdan U-16 kila hap ban leit shim hi ïa ki takma na ka ophis jong ka Meghalaya State Olympic Association (MSOA) shi sngi hadien bala kut ka lympung ïalehkai Meghalaya Games 2022.
Ki nongïalehkai Athletics kiba la jop ha ki kyrdan ïakop ki khlem ïoh takma ha ka sngi kut jong ka Meghalaya Games 2022 bad kila hap ban leit phai ïing thylli, hynrei na ka liang ka MSOA kala bthah ïa ki nongïalehkai ba kin wan shim na ophis namar kim lah shuh ban pynbiang ha ka sngi badei ban sam namar ka jingkhim ka por.
U General Secretary ka MSOA bad Finely Pariat ha ka kyrwoh bala phah sha ki nongthoh khubor u la ong ba ïa ki takma la dep ban pynbiang lut hynrei ym shym la lah shuh ban sam pyndep namar ba lah miet than.
U Bah Pariat u la kubur ruh ba ka don ka jingduna bad khlem lah ban pyndep ban sam hynrei u la ong ba ki takma ki khlem duna bad dei tang na ka daw ka jingslem ym shym la lah shuh ban sam pyndep ha katei ka sngi kut.
Halor kane u Bah Pariat u la panmap da kaba ong ba kum kine ki ju jia khamtam ha ka Athletics kaba bun tam ki takma ym kum kiwei pat ki jait jingïalehkai kiba mar syn kut la lah ban pyndep ban sam ïa kiba jop bad ba rem.
Ki paidbah kila pynsngew bad kynthoh halor ka jingleh jong ka MSOA kaba la pynduh mynsiem ïa ki nongïalehkai kiba la jop bad trei shitom hynrei kila hap pat ban leit phai ïing thylli.
“Ha ka Olympic ym lah ban ong ba kiba jop ha ka Tokyo kin leit shim ïa ki takma na Lausane hadien bala dep pynhap pyrda ïa ka jingïalehkai,” kynthoh iwei na ki riew paidbah.
kum ban pynkynmaw hangne ba ïa ka Meghalaya Games 2022 la pynhap pyrda noh ha ka sngi Thohdieng (6-5-2022) da ka Kong RV Suchiang ha Indoor Training Hall, SAI, NEHU .