Shillong, Ïaiong 01 : Ka National People’s Party (NPP) ka la sdang da ka jingïalang ha Nongstoin ban pynkhreh na bynta ka elekshon MP sha Lok Sabha kaba la khmih lynti ba yn sa pynbna noh shen ha kine ki khyndiat bnai ban wan ban pyndap ïa ka shuki ba thylli hadien ka jingkhlad kyndit u Dr. Ricky AJ Syngkon, MP ba jop na ka Voice of the People’s Party (VPP).
Ha ka jingïalang kaba long ha 28tarik mynta u bnai, ka party ka la pynskhem ruh ïa ki nongkitkam ba thymmai jong ka Nongstoin Block bad kumjuh ïa ki nongkitkam ba thymmai jong ka National People’s Youth Front (NPYF). Ïa kine ki nongkitkam baroh la pynskhem da u Working President ka Party, Bah Hamlet Dohling ryngkat ka jingdonlang u Nongai Ktien ka Party, Bah HM Shangpliang, Bah Kit Nongrem bad kumjuh u MLA ka thain Bah Gabriel Wahlang.
Kine ki nongkitkam ba hakhmat jong ka NPP Nongstoin ki kynthup ïa u Bah Gabriel Wahlang, MLA kum u President, nangta lai ngut ki Advisor ba kynthup ïa u Bah Nondi Diengngan, Bah Nestindar Nongdkhar bad Bah Dles Marbaniang. Nalor kine la jied ruh haduh 12 ngut ki Working President.
Ki nongïalam ba hakhmat ka party ki la pynskhem ruh ïa ki nongkitkam jong ka NPYF kaba kynthup ïa u Bah Ronald Syiem kum u President, Bah Kyntonborlang Mawsor kum u Senior Working President bad bun ngut ki Working President.
Na ka liang ki nongïalam ka party ki la pynpaw ïa ka jingkmen ban ïohi ïa ka jingmih shakhmat jong ki riewrangbah kiba shemphang ban treilang bad ka party na ka bynta ban pynkhlain shuh shuh ïa ka party nangne shakhmat khamtam eh ha ka jingpynkhreh na bynta ka elekshon MP.
