Na Mylliem constituency sdang ka UDP ban pynkhreh ïa ka elekshon MLA 2023

Shillong, Iaiong 15 : Da ki spah ngut ki nongkitkam ba hakhmat jong ka UDP Mylliem ki la kynduh lang ha kane ka sngi Palei ban jied ïa ki nongïalam ba thymmai kum shi bynta ban pynkhreh na bynta ka elekshon MLA kaban long ha u 2023 na Mylliem constituency.
Ha ka jingïalang kaba long ha Lawsohtun la donlang ruh naduh ki nongïalam ba hakhmat jong ka UDP ba kynthup ïa u General Secretary, Dr. Jemino Mawthoh, Bah Paul Lyngdoh MDC ba dei ruh u Working President, nangta u Vice President Bah Allantry F Dkhar, Bah Eugene Lyngdoh MLA ka Mawphlang, Bah Ryngkat Lyndem MDC ka Langkyrdem, MLA barim ka Mawlai Bah Embhah Syiemlieh, Bah Tirot nalor kiwei kiwei.
Kiba bun ki nongkren ha katei ka jingïalang ki la ai ka jingkitbok ïa katei ka kynhun ba thymmai hapoh ka jingïalam jong u Bah Spar Lyngdoh kum u President bad Bah Bankhraw Kupar Sohtun kum u General Secretary ba kin pyntyllun stet ïa ka kam na ka bynta ka elekshon MLA kaban long ha u snem ban wan.
Haba kren ha katei ka jingïalang, u General Secretary ka party, Dr. Jemino Mawthoh u la ong ba naduh ba u shimti kum u nongïalam ka UDP kam pat jop shisien ruh na Mylliem constituency watla ki la don bun kiba ïakhun la ka long ha ka elekshon MLA bad kumjuh kum ki MDC. “Nga don ka jingkyrmen kaba skhem ba da ka jingtrei borbah jong kane ka kynhun ba mynta ngin poi beit sha ka thong,” u la ong.
Nalorkata, u la ong ruh ba shen kin sa sakhi ïa ka jingkynduh lang kaba kham heh bad kham shongkun ha kaba baroh ki nongïalam ba rangbah jong ka party ruh kin sa donlang.
“Kane ka dang dei tang ha ka trailer shwa, shen ngin sa kynduh biang ha ka jingïalang kaba kham heh,” u la ong da kaba ïaroh ïa ka kynhun kaba thymmai kaba la lah ban lum lang haduh kattei ngut watla kadei ha ka sien kaba nyngkong ruh.
U Bah Paul Lyngdoh pat u la ong ba ka por ka la biang ba ïa ka kam synshar khadar ym dei shuh ban aiwai ha ki party kiba na shabar hynrei ban synshar hi da ki party kiba dei na kane hi ka jylla kiba sngewthuh bad tip khambha ïa ka jingeh bad ka jingdonkam jong ka jylla.
U ong ruh ba dei na ki jingduna kiba bun kiba don ha ka jylla kaba pynlong ïa ki khun samla ban mih na ka jylla ban leit wad kam shabar. “Naduh ka kam ka jam haduh ka synshar khadar la shu aiwai bad ainong ha kiwei.”
U Bah Eugene ha ka jingkren jong u, u ong ba donkam ïa ki khun samla jong kane ka juk mynta ban mih shakhmat ban ïakhun na ka bynta ka lawei kaban sa wan. “Namar ka bor jongngi kadei kaei kaba ngi lah ban leh mynta na ka bynta kaban sa wan.