Shillong, Jymmang 26: Ka long ka kabu na bynta kito ki khynnah bad samla jong ka jylla kiba don sap ha ka kam ïalehkai football, ha kaba ka JSW Bengaluru Football Club kan sa wan ban wad ïa ki khynnah ïalehkai football na bynta ban pynrung bad ai jinghikai pyntbit shuh shuh ha ka shlem ai jinghikai.
Kane ka sienjam ba la shim da ka JSW Bengaluru Football Club Private Limited ka long ruh kum shi bynta ban kyntiew ïa ki samla don sap ha ka kam ïalehkai football. Ka Bengaluru FC kan sa pynlong da ka jingpyrshang (trials) na bynta ki U-13, U-15 bad U-18 ha u bnai Jylliew ban wan.
Ka Bengaluru FC Residential Academy kaba la seng ha u snem 2016 ka la pynmih ïa shibun ki nongïalehkai ba dang khie kiba mih madan ruh mynta ha ka I-League bad kumjuh ruh ha ka Indian Super League (ISL), katba kiba bun napdeng jong ki mynta ki don bad ka kynhun jong ka Bengaluru FC.
Katkum ka kyrwoh, la ïathuh ba ka thong jong ka ka long ban ailad na bynta ki player ha kiba bun ki liang ba kin nang lah ban pynjanai ïalade bad ba kin ïoh ban mihkhmat ïa la ka kynhun (Bengaluru FC) bad kumjuh ruh na bynta ka kynhun ïalehkai football jong ka ri India. La ïathuh ruh ba ka kynhun kan pynbiang nadong shadong ha ka shlem ai jinghikai kaba don ha Inspire Institute of Sport ha Bellary ba kynthup naduh ki jaka ïalehkai khnang ba kin lah ban pyntbit shuh shuh ïalade.
Ïa ka jingpyrshang khynnah ïalehkai (trials) hapoh ka jylla yn pynlong shwa ha madan jong ka MFA Third Ground, Polo, Shillong kata ha ka 30 bad 31 tarik Jymmang bud pat sa ha Umsning Sports Cultural Club, Ri-Bhoi ha ka 1 bad 2 tarik Jylliew bad khatduh yn pynlong ha ka 3 bad 4 tarik Jylliew ha U Kiang Nangbah Stadium ha Jowai. Ïa kane ka prakram yn pynïaid da ki coach kiba la don license. Ïa ki player kiba shah jied yn sa khot pat ha ka jingpyrshang kaba khatduh kaban long ha Residential Academy kaba ha Bellary.
