Na Mawkyrwat Constituency, sdang u Bah Robertjune Kharjahrin ban ïalap elekshon MP

Mawkyrwat, Rymphang 13: Kum shibynta jong ka jingpynkhreh ïa ka elekshon sha ka Lok Sabha, na ka liang ka Regional Democratic Alliance (RDA) kaba kynthup ïa ka United Democratic Party (UDP) bad ka Hills State People’s Democratic Party (HSPDP) ki la sdang ban mih sha madan ban ïalap elekshon ne pynshai ïa paidbah ïa ki mat bad ki jingthmu ban ïaid nangne shakhmat.
U Robertjune Kharjahrin kum u kyrtong na ka Shillong Parliamentary Seat haba kren ha kane ka sngi u la ong ba ka kam ban jied ïa ki nongmihkhat ki ban shon hapoh ka Parliament sha Delhi ban ïa sait na ka bynta ki Riti shynshar khamtam ïa ki paid riewlum hapoh ka jylla Meghalaya bad jong ki paidbah kam dei ka kam kai hynrei ka dei ka kam ïap kam im. Ha ka jingkren jong u, u la ban jur ïa ki lai tylli ki mat ba kongsan eh kata ka long ban ïada ïa ka Ri bad ka Jaidbynriew na ki nongshun kiba nabar bad ki nongshun kiba napoh, kawei pat ka long ban pynneh pynsah ïa ki snap kiba kyrpang jong ka Riti ka dustur jong ngi uba rim ba jah bad ban kyntiew ïa ka Jylla bad ka ri ha ki liang baroh.
“Ka Ri India ka dei kawei ka Ri kaba khraw ha ka pyrthei kaba khlaiñ bad kaba lah ban knieh noh ïa ka jingbun briew na ka Ri China ha kine ki snem ban wan”, u la ong. Namarkata, u dei u briew uba donbok tam ba u ïoh lad ban mihkhmat na ka party Riewlum kaba heh duh hapoh ka jylla Meghalaya ha ryngkat da ka jingïatreilang ka UDP bad ka HSPDP watla shibun ki briew kiba nang la stad ki ‘riew rangbah na kine ki ar tylli ki seng saiñ pyrthei bad napdeng ki kyrtong ki ban sa ïa aireng ha kane ka elekshon MP na kiwei pat ki party nga uba dang samla tam napdeng kita.
Ha ka jingkren jong u, u la pynsngew ruh ba ma u um shem la long kum kiwei kiba briew kiba biang ka spah ka phew hynrei u wan na ka longïing kaba duna ha ka ïoh ka kot, ha shwa ba un mih ha ki rynsan seng saiñ hima sima u la phrang ïa lade ban long shwa kum u nongïalam na ka sengbhalang ha ki snem kiba la dep. “Kane ka kam ruh kam long shuh kaba thymmai nga la tip lut ïa ki jingeh, ki mat ki jura jong ka jaitbynriew, ha baroh ki liang namarkata, ka la dei ïa nga ba kane ka jingshakri ïa ka jaitbynriew bad ïa ri khasi kan ym kut tang hangta da kaba kwah ban long kum u nongïasait sha ka dorbar bah jong ka Ri India kata hapoh ka Parliament sha Delhi”, ai jingpynshai shuh shuh u bah Roberjune.
Namarkata, haba bynrap ïa ka jingkren u ong ba ha kane ka elekshon MP ymdei shuh ban sngew-marthain, sngew-niam ne sngew-party hynrei ka la dei ka por ba ka Bri u Hynñiewtrep Hynñiewskum ka jong ngi ban phah ne jied beit tang ïa uwei u nongmihkhmat uba pyntikna bad uba lah ban trei ïa ki kam jong u paidbah bad na ka bynta ka Ri bad ka jaidbynriew uba kynsai bad uba janai tam.
Haba kren pat ha kaba ïa dei bad ki MP uba la jop ha kine ki snem ba la leit, “Ngi la ïoh mat ha kine ki 15 snem ba la dep kaei ba kine ki MP ki la leh, ngam kwah ban batai hynrei sa bishar hi ki paidbah”, ula ong.
Ha kaba ïa dei bad ka jingkwah jong u ban Robertjune ban ïeng bad ïa khun ha kane ka MP Election 2024 ka long ruh ban wanrah ïa ka synshar khadar kaba khuid bad kaba ngi lah ban ïa tip lang ki paidbah ïa ki skhim bapher bapher ba ki paidbah ki dei ban ïoh.
Lah ban kdew ba ïa ka jingïalang bad jingpynshai paidbah la pynlong ha ki lai tylli ki jaka kawei la pynlong ha Ïew Mawkhan, Pyndenumsaw, ha Ïew Rangblang bad ha Ïew Umjaraiñ kiba hap hapoh ka Mawkyrwat Constituency.
La ïa donlang ha kane ka sngi ki long u bah Tirotsing Suchiang, Joint Secretary UDP Central Body bad kiwei de ki nongïalam ba hakhmat jong UDP Mawkyrwat Consti-tuency.