Na Mawhati Constituency – Rai u ophisar bala shongthaid ka PWD ban aireng ïaka elekshon 2023

Nongpoh, Jymmang 12: U Bah Baiahunlang Makdoh ba ju khot ieid kum u Bah Baia u ba dei ruh u ophisar bala shongthaid naka tnad PWD (Rds) u la rai ban mih pyrthei bad ban aireng ha elekshon sha ka iing dorbar thaw aiñ ka jylla ban long ha u snem 2023 na Mawhati Constituency.
Kumba la pynpaw da utei u rangbah u la ïathuh ba u dei u trai shnong naka shnong Mawrong ha Ri-Bhoi bad u la pule bad pyndep ïaka kyrdan BE (Civil) na Ahmedabad bad kumjuh ruh na Gujarat, bad u la trei ruh kum u ophisar haka tnad PWD la kumba 30 snem hadien ba u la shongthaid noh naka kam bad dei hadien ka jingpyrkhat janai ïaka jinglong jingman ka Mawhati, u tei u rangbah bala ih bha ka rta u la shim ïaka rai ban mih pyrthei kum uwei naki kyrtong ban aireng haka elekshon sha ka iing dorbar thaw aiñ ka jylla ha u snem 2023 na Mawhati Constituency.
“Nga jaw ummat bad pang ka dohnud haba nga leit sharum shaneng bad bun naki paidbah ki ud ki nam halor ka jingsahdien ka Mawhati Constituency haba phai ha baroh ki liang naduh ka roi ka par, ka pule ka puthi bad kiwei kiwei khlem da jer kyrteng, ha kaba ki paidbah hi ki lah ban iohi bad bishar” la ong u Bah Makdoh da kaba bynrap ruh ba la donkam ban thaw thymmai bad wanrah ki jingkylla haka constituency baroh kawei naka bynta ka lawei ki khun samla.
U la pynpaw ruh ba ka nongrim bala pynlong ïa u ban shim ïaka rai ban aireng ha kane ka elekshon ban wan ka dei namar ka jing sahdien shaba palat jong ka Mawhati Constiteuncy kaba dei namar ba ym don ki nongïalam kiba kitkhlieh ïaka kam bala bynshet, khlem da klet pat ïaki matti ki nongïalam barim naduh u Prof MN Majaw u ba dei u MLA ka nyngkong jong ka Mawhati Constituency, u Bah SR Moksha, Bah PW Muktieh, Bah Donbok Khymdeit bad u Bah JK Dorphang da kaba kyntait pat ban kynthoh eiei ïa u MLA ba mynta u Bah Dasakhiatbha Lamare.
U la ong ruh ba lehse ka dei ka por ïaki paibah ha kane ka kynti kaba mynta ban pyrkhat thymmai ban ioh da u nongïalam u ba long kum u kpa u ba kit ba iai bad bah ïaka eh ka shon jong ki paidbah ka constituency namar lait na u Bah JD Rymbai (Bam kwai ha dwar u Blei), u Dr DD Lapang bad u Bah PW Mutkieh kiba la jam sha ka jinglong tymmen ngim iohi nongïalam shuh ha Ri-Bhoi ban bteng ïaka kam bad lah ruh ban ong ba ka Mawhati ka dei ka constituency kaba dang sahdien na kiba sahdien ha them Ri-Bhoi wat tang ka C&RD Block ruh ym pat don.
Khlem pynthikna la un ioh tiket ne em naka party UDP u tei u Rangbah u la rai ban leit pynïasoh bad don haka lynti ban pan ticket na party UDP, bad kumba u la rai lada ki paidbah ki kyrshan u la rai beit ban mih shakhmat ban aireng ha kane ka elekshon ban wan naka bynta shibun ki jingangnud ban lur ïaka lyngkha ba sah shrah jong ka Mawhati Constituency.