Shillong, Jymmang, 31: Ki dkhot jong ka Hynñiewtrep Achik National Movement (HANM) Eastern West Khasi Hills District Unit ha ka step sngi Balang ki la sdang ïa ka jingïaid kjat ïa kaba la ai kyrteng kum ka “ïaid ehrngiew’ na ka shnong Mairang sha nongbah Shillong kum ka dak ban dawa ïa ka Sorkar Jylla ba ka dei ban khmih bniah bad ban pynbeit thymmai ïa ka Reservation Policy, 1972 bad ruh ban ai jingkyrshan ïa ka jingshah jingit ba khlem pud sngi jong u President ka Voice of the People Party (VPP) u Bah Ardent Miller Basaïawmoit ha parking lot, kaba don markhap bad ka ophis Additional Secretariat, Shillong.
Shwa ban sdang ïa kane ka jingïaid kjat ki dkhot ka HANM ki la pynlong ïa ka jingïalang kaba lyngkot hakhmat ka ing sah jong u MLA ka Mairang Constituency u Bah Metbah Lyngdoh kaba don ha ka shnong Manai.
La sakhi ruh katba ki dkhot jong ka seng ki la sdang ïa ka jingïaid kjat na Madan Mot Tirot shaduh ka jaka shah thngan jong u Bah Ardent ha ka jingjngai kaba long kumba 45 kilomitar, ki paidbah bad ki nongshong dukan ha shi lynter ka surok bah National Highway 44-E ki la mih ban peitkai ïa ka jingïaid kjat jong ki dkhot kane ka seng.
