Shillong, Nailur 13 : Baroh ki nongïalam ba halor duh jong ka National People’s Party ki la poi lut sha ka jingïalang sngewlem bad ban ai khublei khatduh ïa u Myntri Rangbah barim ka Jylla u Dr. DD Lapang uba la khlad noh na kane ka pyrthei ha ka miet sngi Thohdieng ha ka rta kaba 91 snem.
Ha kane ka jingïalang sngewlem kaba long ha ophis treikam jong ka NPP la donlang naduh u National President ka party na dei ruh u Myntri Rangbah ka Jylla, nangta u State President Bah Prestone Tynsong kumjuh u Bah Sniawbhalang Dhar kiba dei ha kajuh ka por ki Symbud Myntri Rangbah ka Jylla.
La donlang ruh naduh u MP Rajya Sabha Dr. WR Kharlukhi, ki Myntri Sorkar, ki MLA MDC kumjuh ki nongïalam jong ka National People’s Women Front kumjuh na ka National People’s Youth Front bad kiwei kiwei ki nongïalam ka party.
Ka jingïalang ka la pynlong ruh da ka jingsngap jar kaba ar minit kum ka dak ban kynmaw burom ïa utei u rangbah uba la long ruh u nongmait lynti ïa ka jylla ha ka roi ka pa bad ha ka jingkiew arted jong ka Meghalaya hapoh ka jngïalam jong u kum u Myntri Rangbah.
Ha kane ka sngi u National President u la ong ba ka jingkhlad noh jong u Dr. DD. Lapang ka long ka jingduh kaba khraw namar u dei uwei na ki nongai buit ba hakhmat eh ïa u bad kumjuh ïa ka sorkar ha kano kano ka por.
U Conrad u la ong ruh ba u Dr. Lapang tad haduh ki sngi ba khatduh ruh u dang kynmaw ïa ki paidbah jong u.
“U dei uba nyngkong eh na baroh ban kren ne phah ïa ki jingai jingmut lane kdew halor ki mat ne ki phang kiba ktah ïa ka jylla. Ka jinglong jong u kum u nongïalam kan ïai bteng ban ai mynsiem ïa ka iing jong ka NPP bad kumta ka jingkhlad noh jong u kan dei ka jingduh kaba khraw ïa baroh,” u la bynrap biang. Nangta u ong ruh ba ka jingkhlad noh jong u ka long kumba ki la duh noh ïa u kpa, u nongïalam bad kum u nonghikai ïa baroh ki dkhot jong ka party.
U ong ruh ba ka iing NPP kan donlang ha syndah ha kum kane ka por, bad ruh ban kynmaw ïa u Dr. Lapang kum u nongïalam uban sah kynmaw na ka bynta ki kam bakhraw jong u.
U la pyntip ruh ba ka Sorkar Meghalaya kan pynlong ka jingleh burom kaba kyrpang ïa u ha ka sngi ontep kaba la buh ban long ha ka sngi Nyngkong kum ka burom kaba khraw na ka bynta ka jingnoh synnïang jong u ïa ka jylla bad ïa ka ri hi baroh kawei.
