Na ki paidbah pan jingkyrshan u Bah Sanbor Shullai na ka bynta u Bah Michael Kharsyntiew ha Oakland bad Bivar Road

Shillong, Nohprah : Katba nangmih ki sngi la ïohi ba ka seng saiñ pyrthei ka Bharatiya Janata party (BJP) hapoh ka jingïalam jong u kyrtong ba pan tiket na ka party u Bah Michael Kharsyntiew, ka 17 North Shillong Konstitwensi ka la nangkiew da ka sdang mih bun ki nongkyrshan.
Ha ka jingleit ban pynshai ïa la ki jong ki nongrim ha kiba bun ki jaka la ïohi ba bun ki nongthep vote ki la ïamih ban sngap ïa kaei kaba une u kyrtong u don ban ong.
Dang ha kine ki sngi ba la pynlong hapoh Riatsam thiah ki nongthep vote khasi ki la ïamih ban leit shimbynta ha ka jingïalang katba ha ka sngi U Blei ha ka jingïalang ha Oakland bad Bivar ka jingïalang ka la long kaba heh ha kaba la wan ban synranlang da u Myntri ka Sorkar jylla na ka seng BJP u Bah Sanbor Shullai bad u MDC barim na Jaïaw u Bah Martamlin Pyrbot, ki nongseng jong ka BJP Meghalaya.
Ha ka jingkren u Bah Sanbor u la kyrpad ïa ki nongthep vote katei ka thaiñ ba kin ai ka jingkyrshan kaba pura ïa ka BJP na ka bynta ki kam pynroi kiba heh.
“Mynta bun ki briew kiba ong ba tang shu poi ha Jorabat katno ka jingibynnud ban peit ïa ki surok suiñ ne fly over road kiba ka Sorkar Assam ka la lah ban tei bad katno ba ka Sorkar Pdeng ka la theh ki kam pynroi ha kane ka jylla ba marjan, kumta lada kwah bun ki kam pynroi ba kin wan beit na Delhi sngewbha jied ïa ka BJP,” kyntu u Bah Sanbor da kaba ai khublei ïa ki nongshong shnong kiba la shimbynta ha kane ka jingïalang ba la pynbeit da ka BJP 17 North Shillong Konstitwensi.
Katba u Bah L Michael Kharsyntiew uba dang pan tiket BJP ban ïakhun na 17 North Shillong Konstitwensi u la ai khublei ïa baroh ki nongshong shnong, ki nongkyrshan, kynthup ïa ki nongkitkam ba halor ka BJP kynthup napoh ka state bad ki dkhot ka BJP National.
“Kumba ong u Bah Sanbor Shullai, dei ban jied beit ïa ka BJP naba lada jied ïa kiwei ki parti hap ïaid lyngba ki Peon lada donkam leit sha Delhi, hynrei lada jied ïa ka BJP ïoh ïa kynduh beit beit ïa u Modi, kumta da pyrkhat bha arsien bad pynshong nongrim bha haba phi ñion ïa u buddam ha ka sngi thep vote,” ong u Bah Kharsyntiew.
Ha kawei pat ka liang kiba bun na ki nongkren ba kynthup ïa ki nongïalam napoh ka State BJP bad BJP National ki la kyntu ïa ki nongkyrshan bad ki nongshong shnong ba kim dei ban sngewthuh bakla naba ka BJP haduh mynta kam pat shym la pynbna ïa ki kyrtong ha ka jylla bad khamtam hapoh 17 North Shillong Konstitwensi.
“Ki don kiba la pynsaphriang bad kam ruh ba ki la ïoh lypa ïa ka tiket BJP napoh ka 17 North Shillong Konstitwensi, hynrei kane ka bym shisha naba ïa ka tiket ba ka election Committee jong ka BJP ym don ba lah ban tip naba ka long kaba eh bha ban lait tuh kum ki jingkylli ha ka por ïaleh eksam ki khynnah,” ong ki nongïalam ka BJP haba kren ha ka jingïalang.
Na ka liang u Bah Kharsyntiew u la ai khublei ïa ka Kong Sumie Laloo – BJP National Executive member & Mahila incharge, ka Kong Unis Khyriem – State Vice President Mahila, u Bhagwati Geonka Senior BJP member, u Dolan Chakraborty- Renown Senior Member & seaso ned politician, u Rangbah Shnong ka Oakland & Bivar road u J K Das, baroh ki dkhot ka Oakland & Bivar Rd Welfare committee bad khamtam ïa baroh ki dkhot polling booth ba kongsan bad ka Mahila team ba ki la treishitom ban pynlong ïa ka jingïalang kaba jop wat hapdeng ka jingkhriat jong ka janmiet une u bnai Nohprah.