Shillong, Nailar, 25: U Myntri ka Rep ka Riang ka Sorkar Jylla u Bah Banteidor Lyngdoh, u la pan jingkyrshan na ka Sorkar India ba kan ai ïa ki lad jingïarap sha ki nongrep ka Jylla.
Da lade hi u Bah Banteidor u la leit ban ïakynduh ïa u Myntri ka Rep ka Riang u Narendra Singh Tomar ha ka 25 tarik mynta u bnai ha New Delhi ban pynsngew ïa ka rai ba ki nongrep ka Jylla Meghalaya ki donkam ïa ka dawai sboh na ka bynta ki jingthung jingrep jong ki katkum ka Office Order ba la pynmih da ka tnad ka Rep ka Riang ka Sorkar Jylla kaba la pynmih ha ka 9 tarik mynta u bnai.
Shwa kane, u Bah Banteidor ha ka 23 tarik mynta u bnai u la ïakynduh ruh ïa u Myntri Khynnah ka tnad Chemical & Fertilizers ka Sorkar India, u Bhagwant Khuba ha kaba u la ïakren ban pyllait noh ïa ka bhah sboh dawai sha ki nongrep ka Jylla Meghalaya.
Kane ka jingleit pynsngew jong u Bah Banteidor sha ki bor ka Sorkar Pdeng sha New Delhi ka long tang shi sngi hadien ba u la kular hakhmat ki nongrep bad ki nongïalam shnong ha ka jingïalang pynshai bad pyntip paidbah ba la ailad ban pyndonkam dawai sboh biang ha ka Jylla kaba la long ha Mawkatheiñ.
Ka tnad ka Rep ka Riang jong ka Sorkar Jylla ka la pynmih da ka Office Order ba ki nongrep kin ïoh biang ïa ka lad pyndonkam dawai sboh kum ka Urea, DAP, MOP bad SSP hadien phra snem naduh ba ka Sorkar barim ka la pynsangeh ïa ka Subsidy na ka bynta ki dawai sboh sha ki nongrep ha ka 12 tarik, Jylliew, 2014 khnang ban pynduna ïa ka jingktah ki dawai sboh ïa ka koit ka khiah ïa ki nongshong shnong.
Ka jingpynmih ïa ka Office Order ban shah pyndonkam dawai sboh kan long tang ha ki katto katne ki jaka rep hadien ba la ïohi ïa ka jingdonkam na ka bynta ki mar rep kum u phan, sohsaw, u kubi, u phul bad kiwei kiba ju rep kynrei ha ka Jylla.
“Nga la ïoh ban ïakren bad kyrpad ïa u Myntri ban theh ki lad jingïarap sha ki nongrep ka Jylla,” ong u Bah Banteidor uba dang don ha New Delhi ryngkat ki nongïalam jong ka Hill Farmers’ Union (HFU)
U la pynpaw ba ha ka jingïakren u la ban jur bha halor ka jingrep ryngkat ka dawai sboh ha ka Jylla namar ki paidbah nongrep kim lah ban pynmih ïa ki mar rep ban pynim ïa ki.
“U Myntri ka Sorkar Pdeng u la khot lang ïa ki Ophisar ka tnad ka Rep ka Riang ha kaba ki la shimkhia bha ïa ki jingpynsngew na ka liang jong ngi ka Jylla Meghalaya,” u la ong.
Ha kawei pat ka liang, u Bah Banteidor u la ïathuh ba ka jingrep khlem da pyndonkam dawai sboh ruh dei ban pynshlur ïa ki nongrep bad ki nongrep kim dei ban shu pyndonkam pathar palat ïa ka dawai sboh.
