Nongpoh, Rymphang 18: Haba leit ban ïalap election ban pan ka jingkyrshan na ki paidbah ban pynjop ha kane ka election MDC na Umroi Constituency, ka Samla Naphishisha Marwein ka kyrtong ka party UPP ka la shah pdiang burom kylla ha ki paidbah nongshong shnong ka Shnong Sohliya ba hap ha ka Raid Ïapngar ba ki paidbah ki leh burom halor ki kam ba bha ba ka la ïarap kyrpang ïa katei ka shnong.
Sa tang da ki sngi kan poi noh sha kata ka sngi ban ïa jied ïa kita ki nongmihkhmat sha ka ing Dorbar thaw aiñ na Umroi Constituency, ka Samla Naphishisha Marwein kum ka kyrtong UDP ha ka janmiet jong ka 17 tarik u Rymphang 2025 ka la leit da lade ban ïalap election ha katei ka shnong Sohliya bad kaei kaba la ai mynsiem ïa ka kum ka kyrtong ka UDP ka dei ba ki paidbah ki pdiang burom kylla ïa ka, haba ka wan ban ïalap election ha katei ka shnong.
Kumba la pynpaw da ki paidbah, nalor kiwei ki kam ba bha ba ka Samla Naphishisha Marwein ka la ïarap hapoh katei ka shnong bad kawei na ka kam kaba kham khraw ba ka la leh, ka dei ka jingshim khia jongka ban ïarap na ka bynta ban pynïoh ïa u Transformer uba la sniew, ba ki paidbah nongshong shnong ki la hap ban shong ha ka jingdum bun bun taiew bad dei lyngba ka jingshim khai jongka sha ki bor ba dei peit ka tnad MeECL katei ka shnong ka la ïoh biang da u Transformer ba thymmai ba ki la ïoh pdiang biang ïa ka jingshai hadien ba la ïoh da u Transformer ba thymmai.
Ha kane ka jingleit ïalap election kane ka samla, naduh ki longkmie, ki longkpa bad ki khun samla ka Shnong Sohliya ki la pdiang burom ïa ka sha katei ka shnong bad nalor kata, ki la pynkup burom ruh da ka riam tynrai ki jaid bynriew Karbi kum ka jingburom ïa kane ka samla kaba la leh bha ïa katei ka shnong.
Na ka liang ka samla Naphishisha Marwein kum ka kyrtong ka UDP na Umroi Constituency, ka la pynpaw ïa ka mynsiem jong ka jingkmen ba ki paidbah nongshong shnong ki la pdiang burom ïa ka ha kane ka jingleit ïalap election bad ha kawei ka bynta ka la kyrpad ruh ïa ki paidbah nongshong shnong ka Shnong Sohliya naduh ki Longkpa, ki Longkmie bad ki Khun samla ban ai ka jingkyrshan ïa ka ha kane ka election MDC bad lada ka jop kan dang lah ban leh shibun ki kam kiba khraw kiba long ka jingmyntoi na ka bynta ki paidbah nongshong shnong ka Umroi Constituency.
