Nongpoh, Nailur 10: Hadien ba la ioh jingtip, ki Pulit ka Umsning Police Statoin hynnin ka sngi ki la hiar mardor ban leit tam noh ïa kaweit ka Metiap ba la lap sa tang ki shyieng bad ki shynrong na kawei ka khlaw kaba don ha jan ka 6th Battlion ba hap ha ka shnong Umran Niangbyrnai ha Ri Bhoi District.
La pynthikna da ki Pulit bad kiba haïing ba katei ka met iap ka dei jong u wei u rangbah ba la tip kyrteng kum u Carlus Tron na ka shnong Ummar uba la jah naduh ka 11 tarik u Jylliew 2025, uba la jah noh ha ka por ba u dang wan phai na Shillong ban leit sha ka Shnong Ummar kaba u la hiar na ka Kali ha Umran Dairy.
Kumba la pynthina ïa kane ka met iap, naduh ki Pulit bd kiba haïing ki lah ban pynshisha ka dei lyngba ka jain kaba u phong bad ruh ka Mobile phone ryngkat ka Sim Card kaba u pyndonkam ïa katei ka Mobile Phone.
La ïathuh ruh, nyngkong eh la lap da ki Nongthohdieng ha katei ka khlaw kiba la pyntip sha ki bor shnong bad ki bor shnong ki la pyntip sha ki Pulit kiba la hiar sha katei ka jaka ban pynlong ïa ka jingtohkit.
La ong ruh ba ki Pulit ki la khot ruh ïa ki bahaing hasem mynta ka sngi sha Umsning Police Station hadien ba la lap ïa katei ka met hynnin ka sngi bad ha ka jingbishar bniah la pynthikna ba udei utei u rangbah ba la jah la jan lai bnai mynta bad la sakhi ruh lyngba ka jain bad ka mobile phone kaba u pyndonkam.
Shuh shuh, na ka liang ki Pulit mynta ka sngi hadien ba la tohkit bniah bad la leh katkum ki kyndon ki la aiti noh ïa katei ka met sha kiba haïing hasem ba kin pyndep pat ïa ka jinglehburom khatduh ïa katei ka met ba dang sah jong u.
Shuh shuh, na ka liang u Bah Andrias Tron kumba uba haïng ruh u la pynshai sha ki lad pathai khubor ba ka dei ka met jong utei u rangbah kumba la lap lyngba kitei ki sakhi bad ha kajuh ka por u ai khublei ïa ki shnong, ki pulit bad baroh kiba la don bynta ban lap noh ïa ka met jong utei u rangbah.
