Na ki 60 ngut ki MLA, kyntu ki Nongshet ja sngi ban ïakren pynbeit ïaki jingeh ha ïing Dorbar thawaiñ

Jowai, Nailur 06: Ki nongïalam jong ka All Jaiñtia Mid Day Meal Worker Union Jowai (AJMDM-WU) West Jaiñtia Hills District mynta ka sngi haba ïakren sha ki lad pathai khubor ha nongbha Jowai ha ryngkat ka jingïadonlang naduh u Adviser ka seng ma Khroo L. Pariat, u President ma Jerry Suting lem bad ki dkhot ka seng, kila buh ka jingkyntu ïa ki 60 ngut ki MLA jong ka jylla Meghalaya ba kin ïakren ïa kane ka jingeh jong ki Nongshet ja sngi ha ki skul ha kane ka Dorbar (Session) ka ban sa long haka 9 tarik mynta u bnai Nailur.
“Kane kala dei ka por ba ki nongmihkhmat baroh 60 ngut hapoh ka jingïalam u myntri rangbah u Conrad K Sangma, ba kin shim ka jingkitkhlieh ban pynbeit noh ïa kane ka jingeh jong ki Nongshet ja sngi hapoh ka jylla kiba la don ym duna ïa ka 19 hajar ngut” ong ma Pariat, kila buh ruh ka jingkyntu na kiwei de ki nongïalam ñiam Khristam ba kin ai ka jingkyrshan ba pura halor kane ka jingdawa.
Kumba long mynta kine ki nongshet ja sngi hadien ka jingïakhih da kaba shong kyllaiñ myngngor ha nongbha Shillong dang ha kine ki khyndiat sngi ba la dep kila pynpaw ka jingai khublei halor ka jingshimkhiam jong ka sorkar jylla kaba la kular ban pynïoh ïa ka bainong haduh 3 hajar tyngka na kaba kila ju ïoh 1 hajar tyngka.
U ma Khroo L. Pariat ula ong ba ka AJMDM-Worker Union hadien ka jingïakren bad ka tnad pule puthi jong ka jylla kila ai ka jingtyrwa ban pynkiew ïa ka bainong (honorarium) na ka 100 tyngka sha ka 2 hajar tyngka naka sorkar jylla bad kaba sah mynta ka long satang ka jingtreikam jong ka Finance, Planning bad ka kynhun Myntri (Cabinet) ban shong jingïalang.
Ha kaba ïadei bad kane ka skim PM Poshan u ma Pariat ula pynshai ba ka don ar bynta kawei ka bhah na ka sorkar kmie kaba la ai haduh 90% bad kawei na ka sorkar jylla ka long 10% kaba ki ïoh ka long tang 1 hajar tyngka, na kane la kyntu jur ïa ka sorkar ban kan pynkiew noh ïa ka sha ka 4 hajar na ka sorkar kmie bad na ka liang ka sorkar jylla kala dep kular ban siew 3 hajar tyngka ka bainong baroh kan long noh 7000 tyngka.
Ka AJMDMWU kala dep ban leit ïa kynduh ïa u lat ka jylla bad na ka liang jong u ruh ula dep ban phah ïa ka shithi sha u myntri rangbah duh ka Ri u Narendra Modi ha ka 6 tarik u June, 2022 hynrei haduh kane ka sngi kim shem la ïoh ïa ka jingbubab, kumta ka seng kala pynbeit ban phah pynkynmaw biang ïa ka sorkar lynba u Private Secretary jong u MR ka Ri.
Kitei ki nongshet ja sngi kila dawa na ka sorkar ba ka dei ban shimkhia ïa kane ka bynta namar kiba bun na ki nongshet ja sngi kidei ki longkmie, da kaba pynkymmaw ruh ba ka sorkar ka siew bainong ïa ki tang ha u bnai April haduh November bad kumjuh naduh u February haduh u March kaba long tang 10 bnai ha ka shi snem, halor kane kila dawa ruh ba ka sorkar ka dei ban siew lang na ka bynta u bnai u December kaba dei ka aiom Christmas bad u bnai January kaba la dawa bha ban thied ïa ki jingdonkam jong ki khun ha ka pule puthi, kumba ïoh lem kiwei ki nongtrei sorkar.
Kila kren shai ‘Lada ka sorkar kam don jingmut ban pynïaid beit ïa kane ka skim PM Poshan, kam don jingmut shuh ba kan don kane ka skim”, hynrei la dei ban pynduh pyndam noh ïa ka, khang ba ki nongtrei kin lait na ka jingshah teh shah khum da kaba siew tang ha ka dor kaba 1 hajar tyngka.