Shillong, Rymphang 20 : Na ki 5 ngut ki MLA ka Congress kiba leit kyrshan ïa ka sorkar MDA bad kiba shah sospon ha ka All India Congress Committee (AICC) hadien ba la phah kaiphod ka Meghalaya Pradesh Congress Committee (MPCC) namar ba ki khlem ïoh jingtip na baroh ar ki kynhun, la ïoh jingtip ba shwa ka election MLA 2023 2 ngut kin sa leit ban pynïasoh noh sha ka United Democratic Party (UDP) bad 2 ngut sha ka National Peoples’ Party (NPP) katba uwei un dang neh hi bad ka Congress kat haduh mynta.
Kitei ki arngut ki ban sa leit pynïasoh sha ka UDP ki long u bah Process T Sawkmie MLA ka Mawlai Constituency bad u bah Mayralborn Syiem MLA ka Nongpoh Constituency. Ki ban sa leit pynïasoh pat sha ka NPP ki dei I Dr Ampareen Lyngdoh MLA ka East Shillong Constituency bad u bah Kimfa Marbaniang MLA ka Rambrai-Jyrngnam Constituency katba u bah Mohendro Rapsang kat haduh mynta u dang rai ban neh beit bad ka Congress hi.
Kine ki san ngut ki MLA ki la leit ban kyrshan ïa ka sorkar MDA ha ka 8 tarik mynta u bnai namar ki pynpaw ba ki kwah ïa ki kam pynroi pynpar ha ki constituency jongki namar ka sorkar ruh ka la kular ban ai ïa ki skhim na ka bynta jongki ym dei ba ki ïa kwah shuki myntri hynrei ki pynpaw ba ki pyrkhat na ka bynta ki paidbah.
Hynrei namar ba ki khlem ïoh jingbit ne pyntip sha ka MPCC ne AICC ba ki leit kyrshan ïa ka sorkar MDA kaba ïa synrop lang da ka BJP ka AICC ka la sospon noh ïaki ha ka 13 tarik mynta u bnai. Wat la ka AICC ka sospon bad ka MPCC ka pan jubab bad jingpynshai na ki hynrei kat haduh hynnin ka sngi kine ki san ngut kim pat ai jubab satia sha ka MPCC.
Na ka liang jongka sorkar pat ha ka Sngi Thohdieng ka la ai sngewbha ïa kine ki MLA kiba leit kyrshan ïa ka da kaba ai ïa ki da ki shuki Co-Chairman.
Kat kum ka jingpynbna ba pynmih daka Sorkar, u MLA ka Congress na Mawlai Bah PT Sawkmie bad MLA ka West Shillong Bah Mohendro Rapsang kila shah thung kum ki Co-Chairmen ka Meghalaya New and Renewable Energy Development Agency (MNREDA).
U MLA ka Congress na Nongpoh Bah Mayralborn Syiem ula shah thung kum u Co-Chairman ka Meghalaya Industrial Development Corporation (MIDC) bad MLA ka Rambrai-Jyrngam Bah Kimfa Marbaniang ula shah thung kum u Co-Chairman ka Meghalaya Government Construction Company (MGCC). Ïa kine ki MLA la thung ha ka kyrdan A+category ha ryngkat bad ki jingmyntoi ba ki dei ban ïoh.
Nalor kine ki 4 ngut ïa u MDC ka Laitumkhrah-Malki Constituency u bah Fantin Joseph Lakadong u kurim jong I Dr Ampareen hi, u la ïoh ïa ka shuki Vice Chairman jongka MGCC namar u bah Lakadong u la dep pynïasoh lypa bad ka NPP ha kine hi ki khyndiat sngi bala dep.