Shillong, Lber 31: Ka West Khasi Hills kala ïoh rung sha ka final na ka Zone 1 jong ka lympung ïalehkai cricket ki kynthei ba la pynïaid da ka Meghalaya Cricket Association (MCA) bala tip kum ka U-23 Women’s Inter District Cricket Tournament. Kane ka jingïoh rung sha ka final kadei hadien ba kala pynliem noh da phra wicket pyrshah ïa ka All Jaintia CA ha ka jingïakhun ha ka sngi Palei ha Nongstoiñ.
Ha ka jingïakhun semifinal kaba ar, ka AJCA kala tied nyngkong hadien ba ka WKH kaba la jop ïa ka jingkynting pisa kala kam ban tied nyngkong, ha kaba ka khlem lah bha ban kamai ron bad kamai tang 56 ron duh noh 8 wicket. Dei tang ka Ritreki Pohshna kaba kamai bun ron da 11 ron na bynta ka All Jaiñtia Cricket Associaiton (AJCA). Kiba la khur bun wicket na bynta ka West Khasi Hills ki kynthup ïa ka Ridahun Nongsiej ka ïoh 2 wicket ai kamai 3 ron bad ka Abiezer Kharsyiem ka ïoh 2 wicket ai kamai 7.
Haba wan beh ïa katei ka thong bala buh da ka AJCA, ka WKH ka donkam tang hynriew over bad ïoh khur jingjop, ha kaba ka Sildamicresha Marbaniang ka kamai 19 ron na ki 10 bol. Ka Ridahun Nongsiej ka ïoh khur ïa ka khusnam Player-of-the-match.
Haba phai pat sha ka Zone 2, ka jingïakhun hapdeng ka Tura District CA bad East Garo Hills la pynsangeh noh ha Nongalbibra, South Garo Hills. Kumba long ba baroh ar ki kynhun ki khlem ïoh ban mih madan ban knieh kyrdan ba hakhlieh ha ka zone, hynrei ka South Garo Hills kala dep ban rung sha ka final da kaba jop laisien na ki laisien ïakhun.
Ha ka sngi Saitjaiñ, ka East Khasi Hills bad ka West Khasi Hills kin ïakhun khatduh na ka Zone 1 bad kaba jop napdeng kine ki ar tylli ki team kin ïakhunpyrshah ïa ka South Garo Hills kaban long ha ka 5 tarik Ïaïong ha ka final.
