Nongstoiñ, Nailar, 20: Ka seng saiñ pyrthei kaba la tip kum ka United Democratic Party, kaba dei kawei na ki seng kaba la kham rim ha ka jylla bad kaba dei ruh kawei na ki seng kaba la kham bun paid napdeng ki seng Ri lum, mynta ka kynti ka la sdang ban pynmih madan shi syndon da u kyrtong MLA ban ïakhun pyrshah ha ka election kaban wan kaba dei na ka bynta u snem 2023.
Kane ka seng wat haba ka la bet ïa u symbai naduh ki phew snem kiba mynshuwa, hynrei ha kane ka kynti kaba ki paidbah ki lah ban ïohi ba la sdang ban mih u shylluid u ba la kham ibit ruh ban ot lada wan ka aiom. Namar ïa une la kyrshan lang ruh da ki riew radbah kiba na ka seng HSPDP kum u bah LG Nongsiej MDC barim ka Nongstoiñ bad na kiwei kiwei kiba na ka seng NPP, Congress bad ka lah ruh ban buh jingma ïa ka khet u Macmillan Byrsat MLA ba mynta.
Ïa kane la pynshisha ruh lyngba ka jingïakren bad uwei na ki radbah jong seng UDP Nongstoiñ Pyllun u ba la ïathuh ba ka seng, ka la shim ïa ka rai ban pynïeng ïa u bah Pullstar Nongsiej u ba na ka shnong Upper New Nongstoiñ na ka bynta u snem 2023 kum u kyrtong MLA na ka seng UDP. Ka jingïalang paidbah kan long mynta u bnai ha Nongstoiñ, ka ban long ruh kum shi bynta ban pdïang burom ïa u bah L.G Nongsiej bad ïa kiwei kiwei.
