Shillong, Naitung 14 : Ka Raid Laban Sports Social and Cultural Club, da ka jingkyrshan u MLA ka South Shillong, u Bah Sanbor Shullai ka la pynkup burom ïa 6 ngut ki khynnah kiba don jingthut ha ki dkhot met namar ka jingtbit jong ki ha ki kam ïalehkai kumjuh ruh namar ka jingpass bha ha ka eksam SSLC, kata ruh wat hapdeng ka jingban ka jingduk.
Kine ki khynnah kidei kiba leit skul bad bad sah ha Fernando Speech and Hearing Centre, Umïam Ribhoi District, Bethany Society, Shillong, Jyoti Sroat School, Shillong bad na Lumparing Vidhyapeeth Secondary School, Shillong.
Haba kren ha ka jingïalng pynkup burom kaba long ha State Convention Centre, Shillong u Bah Sanbor u la ong ba ïa ka song ai sngewbha sha kitei ki samla kadei kaba la mang kyrpang na ka tulop kaba shi bnai jong u kaba long 2.03lak tyngka.
“Na kane Shi Lak tyngka nga ai ïa ka samla Prisca Pyngrope ka samla kaban leit aireng ha ka World Armwrestling Championship kaban long ha Moldova kaba ha dewbah Europe ha u Nailar mynta u snem.”
Kane ka samla kaba dei na Bethany Society wat hapdeng ka jingthut ki kjat pynban ka la paw kum kawei na ki thei ïalehkai ba pawnam bha ha ka jingïakob khun kti bad mynta ka kynti ka ïoh lad ban mihkhmat ym tang ïa ka jylla hynrei na ka ri India.
Ïa ki san ngut kiwei pat la ai da ka song pisa kaba mar 20 hajar tyngka marwei sha ka samla Aisilda Thabah na Nongstoin, West Khasi Hills bad ïa u Novenius Roiky Dkhar uba na Madan Kynsaw na West Jaintia Hills, kiba la wan ba-ar ha ka National Armwrestling & Para Armwrestling Championship 2024.
Nalorkata la pynkup burom ruh ïa ka Ankita Das kaba na Lumparing, Shillong kaba la ïoh haduh 89 persen ha ka Matrik wat hapdeng ka jingthut ki dkhot met. Nangta ka samla Syrpailin Wahlang na Nongstoin, West Khasi Hills bad u samla Skhemlang Lyngdoh Nonglait na Umlatar, Ribhoi District kiba la wan shakhmat ha ka jingpule bad ha ki kam ïalehkai wat hapdeng bun ki jingeh ha ka jingim na ka daw ka jingthut ha ki dkhot met.
“Kine baroh hynriew ngut ki dei na ki longiing kiba duk hynrei ki la pyni pat ïa ka jingaiti lut met bad mynsiem la ka long ha ka jingpule bad kumjuh ruh ha ki kam ïalehkai,” u la ong.
Haba pynpaw ïa ka jingkmen ba u lah ban ïarap lang ïa kine ki samla kiba dei na ki bynta bapher bapher jong ka rilum Khasi Jaintia, u Bah Sanbor ula ong ba u dap da ka jingkmen ban ïoh ïa kmen bad ïa kyrshan ïa kum kitei ki samla kiba don ka thong ha ka jingim wat ki don ka jingthut ha ki dkhot met.
U ong ruh ba u sngew sarong ban tip ba ka samla na ka jylla kan ïoh banleit aireng sha ka lympungbah jong ka pyrthei kaban long ha dewbah Europe ha u Nailar bad dei na kane ka daw khlem pynslem u la noh kylluid 1lak tyngka na bynta ka jingdonkam jong ka.
