Shillong, Nailur 3: Lai tylli ki longïing kiba kham duna ka ïoh ka kot, kata, ka longïing jong ka Kong Tulin Kharbuki, ka longïing jong ka Kong Philinda Kharbuki bad ka Kong Nanashisha Kharbudnah ki la ïoh ïa ka ïing kaba paka ba la pynshna lyngba ka skhim Pradhan Mantri Awaas Yojana-Gramin ha ka shnong Kynton Mynnar, East Khasi Hills District.
ïa kine ki lai tylli ki ïing,la plie paidbah da u Block Development Officer (BDO) jong ka Sohiong Community and Rural Development Block u Dr. C.J.K Warjri ha ka sngi Baar ha ryngkat ka jingsakhi lang jong u Rangbah Shnong ka shnong Kynton Mynnar u Bah Highborn Kharbuki, ki nongkitkam shnong bad ki paidbah nongshong shnong.
Ha kane ka sngi la sam ïa ki work order sha ki 15 tylli ki longïing baduk na ka scheme PMAYG ki ban sa shna thymmai ïa ka ïingsah kaba paka lyngba kane ka skhim.
