Shillong, Jylliew, 15: Haduh 46 hajar ngut ki samla na kylleng ka ri India kin sa ïoh rungkam ha ki tnat Shipai jong ka ri hadien ba ka Kynhun Myntri jong ka Sorkar India ka la mynjur ïa ka Agnipath Scheme khnang ban pynrungkam ïa ki samla ha ki kynhun shipai bapher bapher jong ka ri.
Katkum ka jingpynbna jong ka Sorkar, ïa kane ka jingpynrungkam dei ban pynlong hapoh 90 sngi lyngba ki rally thungkam ban sa pynlong ha ka ri India baroh kawei.
Kane ka skhim jong ka Sorkar India kan long ruh ka kabu ïa ki samla riewlum na kane ka thaiñ Shatei Lammihngi ban rungkam ha ka kynhun shipai.
Katkum ki kyndon jong kane ka skhim, ïa kiba la shah pynrungkam yn tip kum ki Agniveers ha kaba katkum ki Services Acts kin trei tang na ka bynta saw snem. Ynda la kut ka jingshakri kaba saw snem, ki lah ban shah aplai (Permanent Enrollment) na ka bynta ban ïoh rungkam pat ha ki tnat Shipai. Kane kan long katkum ka jinglah jong ki ban shakri katba ki dang trei na ka bynta saw snem bad kumba 25% ki Agniveers kin ïoh rungkam ha ki tnat Shipai.
Ïa ka jingpynrung kyrteng lah ban shu thep Online.
Tang kiba kynjoh ka rta 17.5 snem haduh 21 snem ki lah ban aplai.
