Nongpoh, Lber 22: Naka sap ba hikai ka kmie naduh ba dang rit, kawei ka longkmie naka shnong Mawpun Kshaid ha Ri-Bhoi District, kaba dei kawei naki nongsumar tynrai bala paw ban sumar bad pynkoit bun ki jait jingpang kala plie syndon da ka jaka sumar tynrai ban nang pynjanai shuh shuh bad pynsuk ïaki paidbah ba leit phah sumar.
Katei ka longkmie ka dei ka kong Aidaris Marbañiang kaba shong ba sah ha Mawpun kshaid ha Ri-Bhoi District bad kadei ruh kaba la ioh jingithuh kum kawei naki nongsumar tynrai bad mynta ka sngi kala plie syndon da ka jaka sumar haka shnong Mawpun Kshaid bad ïa katei ka jaka sumar tynrai la plie paidbah syndon da u Bah Bandari Ryntathiang Rangbah Shnong ka shnong Mawpun Kshaid.
Naka liang ka kong Aidaris kala ïathuh ba kala sdang ïa katei ka kam naduh ba ka dang rit lyngba ka jinghikai ka kmie bad ka dei ka sap kyrpang ba ka lah ban pynkoit bun ngut ki briew kiba don ïaki jingshitom bapher bapher naduh kiba dang khynnah haduh kiba la san la rangbah, kum ka jingpang ïap shilliang, laitdoh, pait shyieng, ki bym ioh khun, BP, shini bad kumta ter ter da kaba ai da ki dawai kynbat bad kumjuh ruh da kaba shu khem bad kyllan bad kaba la ju sumar ruh bun jaka ha kylleng ka ri Khasi bad Jaintia.
Na ka liang u Bah Bandari Ryntathiang kum u Rangbah Shnong u la ai ka jingkhublei bad jingïaroh ïa kane ka longkmie kaba don shisha ka sap kyrpang kaba u Blei u la ai haka ban pynkoit ïaki jait jingpang bapher bapher bad kyrkhu kyrdoh ruh ba kan dang lah ban shakri sha ki paidbah lyngba ka sap kaba ka don ban sumar bad pynkoit ïaki jait jingpang bapher bapher
