Shillong, Risaw 22: Ka Dr Murchana Khusroo kaba long ka Assistant Professor ka Department of Physics jong ka skulbah University of Science and Technology Meghalaya (USTM), ka la shah jied ban leh ïa ka Research Project kaba kongsan jongka Indian Space Research Organisation (ISRO) hapoh ka Regional Academic Centre for Space (RAC-S) Programme.
Ka Dr Khusroo kaba shong basah ha Danish Nagar, Jorhat, kala ïoh jingmynjur ban leh ïa ka Project kaba la ai kyrteng “Multi-Spacecraft Investigation of Solar Wind Dynamics Through Solitary Wave Analysis: Insights from Aditya-L1 Mission” kadei kaba nyngkong ha ka thaiñ shatei lammihngi ban pyndonkam ïa ki Scientific Data na ka ASPEX (Aditya Solar Wind Particle Experiment) bad MAG (Magnetometer) kaba dei ruh ka solar mission kaba nyngkong, Aditya-L1.
Ka Dr Khusroo kan trei ruh kum ka Principal Investigator (PI) da ka jingïatreilang bad ka Physical Research Laboratory bad ISRO halor katei ka projek.
Kane ka jingwad bniah ne Research ka thmu ban tohkit bniah shaphang ka Solar Wind Dynamics hapoh jong ka Heliosphere, da kaba pynleit jingmut ïa ka rukom treikam bad ban kyntiew shuh shuh ïa ka jingsngewthuh ha kaba ïadei bad ka Solar Wind Turbulence bad Space Weather Phenomena. Kane ka ïaid ryngkat bad ka thong kaba hakhmat jong ka Aditya-L1 Mission.
Ka Dr Khusroo kala pynpaw ia ka jingsngewnguh da kaba ong, “Ka long ka kabu kaba khraw ban noh synñiang sha ka Solar Mission jong ka ri India bad ban mihkhmat ia ka thaiñ shatei lammihngi ha ka rynsan jong ka ri ha kaba ïadei abd katei ka phang jong ka jingstad saian”.
U Chancellor ka USTM u Mahbubul Hoque ula ong, “Ka jingjop jong ka Dr Murchana ka long ka jingsngew sarong kaba khraw ïa ka USTM bad ïa ka thaiñ baroh kawei. Ka pyni ïa ka jingkut jingmut ha kaban kyntiew ïa ki kam wad bniah bad ki jingleh ïa ki kam kiba long thymmai kiban noh synñiang sha ka ri India ha kaba ïadei bad ka jingstad bad ka jingkiew shaphrang ha ka liang ka Science bad Technology”.
