Na ka projek pyni-nam ki heprit rai u CM ban jied ïa kiba paka tam ban bei tyngka

Shillong, Nailar 19 : U Myntri Rangbah ka Jylla Conrad K Sangma u la ai ka jingïaroh ïa ka jingstad bad ka jingproh jabieng ki khynnah mynta kaba ki la pynpaw pyrthei ha ka prokram ba shisngi ba la pynlong da ka North East Centre For Technology Application and Research (NECTAR) ryngkat ka Smart Village Movement , IISER Pune ïa kaba la pynlong ha ka sngi Nyngkong ha State Convention Centre, Shillong.
Na ka liang u Myntri Rangbah haba kren ha ka jingïalang u la ong ba kum u khynnah skul u ju kynmaw barabor ba u tieng bha ïa ka sobjek Science bad ka Mathematics. “Kine ki dei ki sobjek ba ngam ju sngewtynnad bad nga ngeit ba ki don ruh bun kiwei pat kiba ngat kumjuh haba ïadei bad ka Science bad Maths,” u la ong.
Tangba, u ong ba mynta pat da ka jingtreilang hapdeng ka sorkar jylla bad ki tnad kum ka NECTAR bad Smart Village Movement ba la lah ban prat lynti ban pynlong ïa ka sobjek Science, Technology, Engineering bad Mathematics (STEM) bad khamtam eh ka Science bad Mathematics ba kin long ki sobjek kiba sngewtynnad ban tip shuh shuh kham bun.
U Myntri Rangbah u ong ruh ba kane ka dei ka sienjam ban pynrung ha ki khynnah ba kin sngewtynnad ïa kine ki sobjek bad khamtam eh ba kin thrang ban tip shaphang ka STEM.
Ha kajuh ka por u la ai jingmut ruh ba dei ban don kham bun ki Lab bad ki Lab on Wheel lane ki mobile lab na ka bynta ban myntoi kham bun ki khynnah.
“Ngi la sdang ïa kine ki sienjam ha ka jylla hapoh ka Smart Village program bad ka la don shisha ka jingsngewtynnad hapdeng ki ban tip bad nang shuh shuh kham bun.”
U Myntri Rangbah u la banjur ruh ïa ka jingdonkam ban don ka jingïakob halor ka Science bad Mathematics bad kumta u la kyntu ïa ka tnad Education ba kan don ki prokram ba kyrpang ha ki skul ba kin leit jngoh ïa ki Science Lab bad ki Centre bad ruh kumjuh ban don ïa ki rynsan ïakob halor ka sobjek Science bad Maths ha ki kyrdan bapher bapher bad pynkut pat ha ka State Level.
U Myntri Rangbah u kyntu ruh ïa ka tnad Education, NECTAR, ki nongtreikam lajong bad ki kynhun bapher bapher ba kin wan ha kajuh ka rynsan ban pynmih kham bun shuh shuh ki STEM Lab khamtam eh ha ki shnong ki thaw.
Ban pynshongshit shuh shuh ïa ki khynnah kiba wan ban shim bynta, u Myntri Rangbah hadien ba u la dep ban plie ïa katei ka jingpyni nam u la pynbna ruh ïa ka song pisa kaba 2lak tyngka ïa kiba wan nyngkong, 1lak tyngka ïa kiba wan ba ar bad 50,000 tyngka ïa kiba wan ba lai bad mar 10,000 tyngka pat ïa ki skul kiba wan ban shim bynta.
Ym tang katta u la pynbna ruh ba ïa kito ki projek kiba ki khynnah ki wallam kiba ka sorkar ka ïahap kan sa jied bad kan sa bei tyngka ban pyntreikam pat ïa ki.
Ha kane ka jingïalang, la donlang ruh u Principal Secretary, Sampath Kumar, Director General, NECTAR, Arun Kumar Sharma, Vivek Shah na ka Smart Village Movement, Dr S Muthu Kumaran, HOD ka Metallurgical and Mineral Engineering, NIT bad Director, Education, Government of Meghalaya.