Na ka kti jong ka President ka Ri India pdiang khusnam ka kong Victorealness Syiemlieh

By Mawphor Editor On Nov 8, 2022

Mawkyrwat, ‘Naiwieng 7: Ka kong Victorealness Syiemlieh kaba dei kawei na ki nongtrei ha ka tnad ka koit ka khiah (nurse) bad kaba la bat ruh kum ka Assistant Director jong ki Nurse hapoh Directorate of Health Services (DHS), Shillong (ba la shongthait) kaba na ka shnong Rangthong, South West Khasi Hills District mynta ka 7 tarik u ‘Naiwieng, 2022 ka la leit ban pdiang ïa ka khusnam na ka kti jong ka President ka Ri India, ka Droupadi Murmu ha ka jingïalang ba la pynlong ha Darbar Hall, Rashtrapati Bhawan, New Delhi.
Ka jingïoh pdiang jong ka kong Victorealness Syiemlieh ïa ka khusam kaba la tip kum ka, “National Florence Nightingale Award 2021” ka dei halor ki kam ba ka ka la pyni bad ai ka jingshakri lyngba ki jingïarap ïa kiba bun bah ki briew la ka long na ka bynta ki briew kiba donkam ka jingïarap ha ka pang ka shitom bad kumjuh ruh ha ka imlang ka sahlang.
Halor katei ka bynta, khyndiat shaphang ka jingïaid lynti jong ka kong Victorealness Syiemlieh kum ka nongtrei ha ka tnad ka koit ka khiah (Nurse): ka la sdang nyngkong eh ïa ka kam ha u snem 1984 ha ka Regional Collage of Nursing, Guwahati kum ka BSc Nursing Student. Kum ka staff nurse pat ka la sdang ha u snem 1990 hapoh Civil Hospital Shillong hadien kata la pynkynriah noh hapoh Mawkyrwat CHC ha u snem 1993.
Nangta, ha u snem 1994 la kyntiew kyrdan kum ka Public Health Nurse (PHN) hapoh Mawkyrwat CHC hi bad kum ka Assistant Matron ha u 2011 hapoh Civil Hospital, Nongstoiñ. Shuh shuh kum ka Nursing Superintendent ha u snem 2016 bad kum ka Assistant Director Nursing ha u snem 2020 hapoh ka Directorate Health Services (DHS), Shillong bad ka la shongthait na ka kam ha ka 31 tarik u Jymmang, 2021.
Haba ïa kren bad u nongthoh khubor, ka kong Victorealness Syiemlieh ka la ïathuh ba kane ka jingïoh pdiang ïa kane ka khusnam “National Florence Nightingale Award 2021” ka long hadien ba ka la ïoh ban pyni ïa shibun bah ki kam kiba ma ka ka la leh na ka bynta ban ai ki jingïarap ïa ki briew kiba donkam, kaba ïa dei ha ka pang ka shitom kham kyrpang eh ban leit sumar ïa kiba ar met bad pynkha ruh ïa ki khun ha ki ïing namar ka jingbym ïoh lad jong ki longkmie ban poi ha ki jaka sumar bad kumjuh ruh ban leit sumar ïa ki briew kiba thiah pang ha ïing ki bym lah shuh ban khih ne pang ïap shiliang.
Shuh shuh ka la ong ruh ba ha ka jingïaid lynti jong ka ha kane ka kam ka la mad shibun ki jingeh bad don ruh ki por ba ka la hap ban ïaid da ka kjat lyngba ki lynti ba khoh ruh khoh ram tang ban poi ha ki longïing kiba donkam ka jingïarap ha ka liang ka koit ka khiah, hynrei watla hapdeng kita ki jingeh ka khlem kynran dien pynban bad ka tur shaphrang ban leh ïa kaba bha tam na ka bynta ki briew kiba donkam ka jingïarap. “Kane ka khusnam ba nga la ïoh pdiang mynta ka sngi na ka kti jong ka President ka Ri India, ka Droupadi Murmu, ka sakhi bad ithuh ïa ki jingtrei shitom jong nga ha ka por ba ka dang don ha ka kam bad lyngba ka jingtrei shitom jong nga kiba bun ki briew ki la ïoh jingmyntoi shibun eh”, ong ka kong Victorealness.
Namarkata, lyngba kane ka jingïoh pdiang jong ka ïa kane ka khusnam kan long ruh ka nuksa kaba bha bad ka jingaimynsiem na ka bynta ki longdien kiba trei ha kane ka kam ban shakri ïa ki para briew kham kyrpang kiba trei ha ki jaka sumar ba kin long borabor kiba trei shitom, trei hok ïa ka kam ba ki bat, kin trei da ka mynsiem jong ka jingaiti lut, kin trei da ka mynsiem jong ka jingkmen, kin pyndonkam hok ruh ïa ka por bad khamtam eh ba kin sngewthuh ba haba ki shakri ïa ki para briew ka long ruh kum shibynta jong ka jingsakri ïa U Blei.
Nalor ki kam kiba ïa dei ha ka liang ka koit ka khiah, ka kong ka Victorealness Syiemlieh ka la ju long ruh ka President jong ka Seng Kynthei Shnong Rangthong (SKSR), ka Secretary jong ka Village Water Sanitation Committee (VWSC), Shnong Rangthong bad dkhot jong ka Juvenile Justice Board (JJB), South West Khasi Hills bad kiwei de.